१८ असार, काठमाण्डौं । एसियाली राष्ट्र जापान रसियामा जारी विश्वकप फुटबलको नकआउट चरणमा पुग्ने एक्लो एसियाली राष्ट्र हो । विश्व फुटबलमा युरोप र दक्षिण अमेरिकी राष्ट्रले दवदवा जमाइरहँदा एसियाली टिमलाई अन्तिम १६ सम्म पुग्नु पनि ठुलो कुरा हो ।

यही एसियाली राष्ट्र जापानले क्वार्टरफाइनल पुग्ने लक्ष्यलाई जीवित राख्दै सोमबार राति अहिले उपाधिको दावेदार मानिएको बेल्जियमसँग प्रतिस्पर्धा गर्दैछ । खेल रोस्टोभ अन डनमा राति ११ः४५ बजेपछि शुरु हुनेछ । जापान समूह ‘एच’ बाट फेयर प्लेमार्फत सेनेगललाई पछि पार्दै अन्तिम १६ मा पुग्न सफल टोली हो । जापानी टिमका प्रशिक्षक अकिरा निसिनोले टिम बेल्जियमविरुद्ध तयार रहेको बताएका छन् ।

‘हामी कठिन संघर्ष गर्दै यहाँसम्म आइपुगेका छौं । अन्तिम १६ मै हामीले कठिन प्रतिद्धन्द्धीको रुपमा बेल्जियम पाएका छौं । बलियो बेल्जियमविरुद्ध खेल्न हामीलाई पक्कै असहज हुनेछ ।’ प्रशिक्षक निसिनोले भने, ‘समूह चरणमै हामीले कोलम्विया जस्तो बलियो टिमलाई पनि पराजित गरेका छौं । टिमको मनोवल उच्च नै छ । त्यसैले हामी बेल्जियमविरुद्ध जित्ने लक्ष्यमा मैदान उत्रने छौं ।’

लगातार छैटौंपटक विश्वकप खेलिरहेको जापानको २००२ र २०१० को विश्वकपमा अन्तिम १६ मा पुग्नु नै ठुलो सफलता हो । त्यसैले जापान अन्तिम १६ भन्दा अघि बढ्दै जापानी फुटबलमा ऐतिहासिक नाम लेखाउने योजनामा हुनेछ । कोलम्वियाविरुद्ध रक्षात्मक रणनीतिमा खेलेर जित हात पारेको जापानले पोल्यान्डविरुद्धको खेलमा आक्रमक रणनीति अपनाउदा पराजित हुन पुगेको थियो । सेनेगलविरुद्धको खेलमा रक्षात्मक रणनीति अपनाएर खेल्दा खेलमा दुई पटक पछि परेको स्थितिमा पनि बराबरी गर्न सफल भएको थियो । त्यसैले प्रशिक्षक निसिनोले यही रणनीति बेल्जियमविरुद्ध अपनाउने देखिन्छ ।

यता, स्टार खेलाडीहरुले भरिएको बेल्जियम जापानलाई सहजै पराजित गर्दै क्वार्टरफाइनलमा पुग्ने योजनामा रहनेछ । २२ खेलसम्म अपराजित रहेको बेल्जियम यही प्रदर्शनलाई निरन्तरता दिने लक्ष्यमा हुनेछ । बेल्जियमका प्रशिक्षक रोबर्टाे मार्टिनेजले जापानविरुद्धको खेलमा बल पोजिसन आफ्नो पकडमा राख्दै जापानलाई पराजित गर्ने योजना बुनेका छन् । मार्टिनेजको योजनामा रोमेलु लुकाकु, इडेन हजार्ड, केभिन डि ब्रुएन र थिवाउट कोर्टियसले साथ दिनेछन् ।

उपाधिको दावेदार रहेपनि बेल्जियमले अहिलेसम्म विशवकपको उपाधि जित्न सकेका छैनन् । १९८६ को विश्वकपमा चौथो स्थान हात पार्नु नै बेल्जियमको ठुलो उपलब्धि हो । त्यसयता चारवर्ष अघिको विश्वकपमा बेल्जियमले अन्तिम आठमा स्थान बनाएको थियो ।

इतिहासलाई हेर्ने हो भने बेल्जियममाथि जापान हावी छ । यी दुई टिम पाँचपटक आमने समाने हुदा जापानले दुई खेलमा जित हात पार्दा दुई बराबरी र एक हारको नतिजा बेहोरेको छ । त्यसैल बेल्जियम बदला लिने योजनामा रहँदा जापान आफ्नो पुरानो प्रदर्शनलाई निरन्तरता दिने योजनामा हुनेछ । यी दुई टिमले २००२ को विश्वकपमा २–२ गोलको बराबरी खेलेको थियो । २०१७ को मैत्रीपूर्ण खेलमा बेल्जियम १–० ले विजयी भएको थियो ।

प्रतिकृया

प्रतिकृया