|  

ओमानमा कोरोना संकट: विदेशी नागरिकलाई प्रवेशमा प्रतिबन्ध

२५ चैत, काठमाडौं । कोरोना महामारी बढेसँगै ओमान सरकारले विदेशी नागरिकहरुलाई मुलुक प्रवेशमा प्रतिबन्ध लगाएको छ । ओमानको कोरोना (कोभिड–१९) भाइरस महामारी रोकथाम, नियन्त्रण तथा उपचार सम्बन्धी समितिको बैठकले विदेशी नागरिकलाई मुलुक प्रवेशमा प्रतिबन्ध लगाउने निर्णय गरेको नेपाली दूतावासले जनाएको छ ।

दूतावासका अनुसार समितिले बिहीबार मध्याह्न १२ बजेदेखि लागू हुने गरी विदेशी नागरिकलाई प्रवेशमा प्रतिबन्ध लगाउने निर्णय भएको जनाएको छ । ओमानको यो निर्णयले नेपाली नागरिक पनि प्रभावित हुनेछन् ।

ओमानी नागरिक तथा ओमानको आवासीय कार्ड वाहकहरूलाई भने प्रवेश खुला राखिएको त्यहाँको उच्च स्तरीय समितिलाई उदृत गर्दै दूतावासले जनाएको छ ।

यस्तै, बिहीबारदेखि लागू हुने गरी व्यापारिक गतिविधिहरू साँझ ८ बजेदेखि बिहान ५ बजेसम्म बन्द राख्ने यस अघिको निर्णय यथावत राख्दै उक्त समयमा मानिस तथा सवारी साधनहरूको आवतजावतमा लगाएको प्रतिबन्ध ८ अप्रिलदेखि लागू हुने गरी खारेज गरेको जनाएको छ ।

इस्लाम धर्मावलम्बीहरूको पवित्र महिना रमादानको अवधिभर लागू हुने गरी साँझ ९ बजेदेखि बिहान ४ बजेसम्म सम्पूर्ण व्यापारिक गतिविधि तथा सवारी साधन र मानिसहरूको आवतजावतमा प्रतिबन्ध लगाउने निर्णय गरेको समेत दूतावासले जारी गरेको सूचनामा उल्लेख गरिएको छ ।

मस्जिदलगायतका अन्य सार्वजनिक स्थलहरूमा जम्मा हुन तथा भेला हुन प्रतिबन्ध, रमादानको अवधिभर सामाजिक तथा साँस्कृतिक कार्यक्रम, खेलकुदलगायत सम्पूर्ण सामूहिक गतिविधिहरू गर्न प्रतिबन्ध लगाउने निर्णय गरेको हुँदा ओमान सरकारले जारी गरेको सम्पूर्ण नियम पालना गर्न त्यहाँस्थित नेपाली समुदायलाई दूतावासले अनुरोध गरेको छ ।