२७ जेठ, काठमाडौं । मध्यपूर्व तनाब झन् बढेको छ । अमेरिकी सेनाले इरानमाथि पुनःभीषण आक्रमण शुरू गरेपछि तनाव उत्कर्षमा पुगेको हो ।

अमेरिकी सेनाको हेलिकप्टर इरानले खसालिदिएको आरोप लगाउँदै सेन्ट्रल कमान्डको निर्देशनमा सैन्य कारबाही गरिएको हो । अमेरिकी आक्रमणको जवाफमा इरानको ‘इस्लामिक रिभोल्युसनरी गार्ड कप्र्स’ले पनि बहराइनस्थित अमेरिकी नौसैनिक पाँचौँ ब्याच र अन्य अमेरिकी ठेगानाहरूलाई लक्षित गरी क्षेप्यास्त्र तथा ड्रोन प्रहार गरेको स्रोतले जनाएको छ ।

दुवै देशबीच भइरहेको यो सैन्य टकरावले विगत केही समयदेखि पर्दापछाडि चलिरहेको शान्ति वार्ता र सम्भावित युद्धविरामको प्रयासलाई गम्भीर संकटमा धकेलिदिएको छ।अमेरिकी सेन्ट्रल कमान्डका अनुसार, हर्मुज जलमार्गमाथि उडिरहेको अमेरिकी सेनाको अपाचे हेलिकप्टरलाई इरानले ड्रोनमार्फत खसालेपछि राष्ट्रपति डोनाल्ड ट्रम्पले तत्काल जवाफी कारबाहीको आदेश दिएका थिए ।

यद्यपि, इरानको अर्ध–सरकारी समाचार संस्था मेहरले भने यस घटनाको जिम्मेवारी इरानले नलिएको दाबी गरेको छ। अमेरिकी आक्रमणहरू मुख्य गरी इरानको रक्षा प्रणाली र राडार संयन्त्रहरूमा केन्द्रित रहेको बताइएको छ।

इरानी सञ्चारमाध्यमहरूका अनुसार पर्सियन खाडी र हर्मुज क्षेत्रका रणनीतिक स्थानहरू बन्दर अब्बास, कस्म टापु, सिरीक, मिनाब र जास्क काउन्टीमा ठूला विस्फोटका आवाजहरू सुनिएका छन् ।