३० जेठ, काठमाडौं ।  भारत सरकारले इन्धनसम्बन्धी नयाँ आदेश जारी गरेको छ ।

नयाँ नियमअनुसार थोक रूपमा इन्धन खरिद गर्ने ग्राहकहरूले अब खुद्रा (रिटेल) पेट्रोल पम्पबाट पेट्रोल वा डिजेल किन्न पाउने छैनन् । साथै, एउटा सवारीसाधनले एक दिनमा अधिकतम २०० लिटर डिजेल मात्र खरिद गर्न सक्ने व्यवस्था गरिएको छ ।

तेल कम्पनीहरूलाई भइरहेको घाटालाई ध्यानमा राख्दै केन्द्र सरकारले यो निर्णय गरेको हो । ११ जुनमा सरकारले आवश्यक वस्तु ऐन अन्तर्गत औद्योगिक तथा व्यावसायिक ग्राहकहरूलाई खुद्रा पेट्रोल पम्पबाट इन्धन खरिद गर्न रोक लगाएको छ । यस्ता ग्राहकहरूलाई आफ्नो आवश्यकताका लागि उपभोक्ता (कन्ज्युमर) पम्पबाट इन्धन खरिद गर्न निर्देशन दिइएको छ ।

यो सूचीमा राज्य सरकारका यातायात विभाग, आईटी पार्क, सपिङ मल, औद्योगिक प्रतिष्ठानलगायतका संस्थाहरू समावेश छन् । यो आदेश अधिकतम ९० दिनसम्म लागू रहने छ । अधिकारीहरूका अनुसार वास्तविक उपभोक्तासम्म इन्धन पुग्ने सुनिश्चित गर्न यो कदम चालिएको हो ।