०७ असार, काठमाडाैं । नेपालस्थित भारतीय दूतावास र पोखरा महानगरपालिका को सहकार्यमा १२औँ अन्तर्राष्ट्रिय योग दिवसको अवसरमा पोखरा रंगशालामा भव्य योग प्रदर्शन कार्यक्रम सम्पन्न भएको छ।

कार्यक्रममा सुरेन्द्रराज पाण्डे प्रमुख अतिथिका रूपमा सहभागी हुनुभएको थियो। साथै नेपालका लागि भारतका राजदूत नवीन श्रीवास्तव, पोखरा महानगरपालिकाका प्रतिनिधिहरू तथा कास्की जिल्ला प्रशासन कार्यालय का अधिकारीहरूको समेत उपस्थिति रहेको थियो। आयोजकका अनुसार कार्यक्रममा ८ हजारभन्दा बढी योग अभ्यासकर्ता, प्रशिक्षक तथा योगप्रेमीहरूको सहभागिता रहेको थियो। विशाल संख्यामा भएको सहभागिताले योगप्रति बढ्दो आकर्षण र स्वस्थ जीवनशैलीप्रतिको जनचासोलाई उजागर गरेको छ।

भारतीय दूतावासले सन् २०२३ देखि पोखरा महानगरपालिकासँग सहकार्य गर्दै अन्तर्राष्ट्रिय योग दिवसका कार्यक्रमहरू आयोजना गर्दै आएको छ। निरन्तरको सहकार्यका कारण पोखरामा मनाइने योग दिवस अहिले एक प्रमुख वार्षिक कार्यक्रमका रूपमा स्थापित हुँदै गएको छ।

कार्यक्रममा वक्ताहरूले योगले शारीरिक, मानसिक तथा आध्यात्मिक स्वास्थ्य प्रवर्द्धनमा महत्वपूर्ण भूमिका खेल्ने बताएका थिए। साथै, यस्ता सांस्कृतिक तथा जनस्तरका कार्यक्रमहरूले नेपाल र भारतबीचको मैत्रीपूर्ण सम्बन्ध तथा जनता–जनता बीचको सम्पर्कलाई अझ सुदृढ बनाउने विश्वास व्यक्त गरिएको थियो।आयोजकहरूले ठूलो संख्यामा भएको सहभागितालाई योगको विश्वव्यापी लोकप्रियता र नेपाल–भारतबीचको घनिष्ठ सम्बन्धको प्रतीकका रूपमा व्याख्या गरेका छन्।