१० असार, काठमाडौं । राष्ट्रिय स्वतन्त्र पार्टी (रास्वपा)का सांसद सुलभ खरेलले खुलातर्फ केन्द्रीय सदस्य पदका लागि उम्मेदवारी दर्ता गरेका छन्।

उम्मेदवारी दर्तापछि सञ्चारकर्मीसँग प्रतिक्रिया दिँदै उनले पार्टीभित्र आफ्नो पक्षमा सकारात्मक माहोल रहेको दाबी गरेका छन्। खरेलले अधिकांश प्रतिनिधिहरूले आफूलाई समर्थन गर्ने प्रतिबद्धता जनाएको उल्लेख गर्दै पार्टीभित्र उत्साहजनक वातावरण रहेको बताए। उनले महाधिवेशनले सक्षम, योग्य र दूरदर्शी नेतृत्व चयन गर्ने विश्वास व्यक्त गरे। उनका अनुसार संसदीय व्यवस्थामा राजनीतिक दल र सरकारबीचको सम्बन्ध अत्यन्त महत्वपूर्ण हुन्छ। सरकारको कार्यदिशा र प्रभावकारिता दलले तय गर्ने नीति तथा एजेन्डामा निर्भर रहने भएकाले रास्वपालाई अझ व्यवस्थित, परिपक्व र संस्थागत बनाउन आवश्यक रहेको उनले बताए। “राष्ट्रिय स्वतन्त्र पार्टी अहिले एउटा वृहत् राजनीतिक शक्तिका रूपमा स्थापित भइसकेको छ। अब यसलाई थप परिपक्व, सुदृढ र प्रभावकारी संगठनका रूपमा विकास गर्नुपर्ने आवश्यकता छ,” उनले भने।

खरेलले पार्टी सभापति रवि लामिछानेले बारम्बार देशको समृद्धिसँग पार्टीको भूमिकालाई जोड्ने गरेको स्मरण गर्दै रास्वपाको भविष्य देशको भविष्यसँग समेत गाँसिएको धारणा व्यक्त गरे। उनले पार्टी कमजोर भए त्यसको असर समग्र राजनीतिक परिवर्तनको अभियानमा समेत पर्न सक्ने बताए। “हाम्रो पार्टीले उठाएका मुद्दा र अपेक्षाहरू केवल पार्टीभित्र सीमित छैनन्। त्यसैले महाधिवेशनलाई मैले नेतृत्व चयनको प्रक्रियामात्र नभई पार्टीको आगामी दिशा तय गर्ने महत्वपूर्ण अवसरका रूपमा लिएको छु,” उनले भने। महाधिवेशनबाट सक्षम नेतृत्व चयन भई पार्टी अझ सशक्त, संगठित र जनमुखी बन्ने विश्वाससमेत उनले व्यक्त गरे।