१६ असार, काठमाडौं । कपिलवस्तुको महाराजगन्ज नगरपालिका–२ गैडहवास्थित हुलाकी सडकखण्डमा यात्रुवाहक बस दुर्घटना हुँदा २२ जना घाइते भएका छन् ।

धनगढीबाट काठमाडौँतर्फ आउँदै गरेको शिवपुरी लक्जरी कोच प्रालिको सुदूरपश्चिम प्रदेश ०१–००१ ख ३७२१ नम्बरको बस अनियन्त्रित भई डिभाइडरमा ठोक्किएर सडकमै पल्टिएको हो ।

दुर्घटनामा बस चालक कैलाली, धनगढीका ४२ वर्षीय हरिसिंह महरासहित सुदूरपश्चिमका विभिन्न जिल्ला र चितवनका गरी २२ जना यात्रु घाइते भएका छन् ।

घाइतेको टाउको, हात, खुट्टा, छाती र कम्मरमा चोट लागेको छ । उनीहरूलाई जिल्ला अस्पताल तौलिहवामा प्रारम्भिक उपचारपछि थप उपचारका लागि युनिभर्सल मेडिकल कलेज भैरहवा रिफर गरिएको प्रहरीले जनाएको छ ।