२३ असार, काठमाडौं । ओमानको तट नजिक स्ट्रेट अफ होर्मुजमा यात्रा गरिरहेको एक ट्याङ्करमा प्रक्षेप्य प्रहार भएपछि आगलागी भएको बेलायतको सेनाले जनाएको छ ।

मंगलबार बिहान भएको उक्त घटना स्ट्रेट अफ होर्मुजबाट गुज्रिरहेका जहाजमाथि भएको पछिल्लो आक्रमण हो । अमेरिका–इजरायल र इरानबिच फेब्रुअरी अन्त्यतिर युद्ध सुरु हुनुअघि विश्वभर खपत हुने झन्डै २० प्रतिशत तेल र प्राकृतिक ग्यास यही जलमार्गबाट ओसारपसार हुने गर्थ्यो ।

तरलीकृत प्राकृतिक ग्यास एलएनजी बोकेको उक्त ट्यांकरले इरानको चेतावनी बेवास्ता गरेपछि आक्रमणमा परेको हो । तर तेहरानले घटनाको जिम्मेवारी भने प्रत्यक्ष रूपमा लिएको छैन ।

इरानले यसअघि पनि होर्मुज जलडमरूमध्यमा आफूले स्वीकृत गरेको मार्ग मात्रै सुरक्षित रहेको बताउँदै आएको छ । ओमानको तट नजिकको वैकल्पिक समुद्री मार्ग प्रयोग गर्ने अन्य जहाजमाथि पनि इरानले आक्रमण गरेको आशंका रहँदै आएको छ ।