२३ असार, काठमाडाैं । गृहमन्त्री सुधन गुरुङले स्थानीय तहका सुझाव र आफ्नै फिल्ड अनुभवका आधारमा गृह प्रशासन सुधारको काम अघि बढाउने बताएका छन्।

मंगलबार राष्ट्रिय सभा बैठकमा बजेटमाथि उठेका प्रश्नको जवाफ दिँदै उनले सीमा समस्या, तस्करी नियन्त्रण र सुरक्षा व्यवस्थाका विषयमा प्रभावकारी सुधारका लागि आफू जिल्ला–जिल्लामा पुगेर अनुगमन गरिरहेको जानकारी दिए। गृहमन्त्री गुरुङले गृह प्रशासन अब कागजी प्रतिबद्धतामा सीमित नभई नागरिकले प्रत्यक्ष महसुस गर्ने सुरक्षा, सुशासन र निष्पक्षतामा केन्द्रित हुने दाबी गरे। उनले नागरिकको जिउधन र स्वतन्त्रताको संरक्षण गर्नु गृह प्रशासनको मुख्य जिम्मेवारी रहेको उल्लेख गर्दै मानव अधिकार र कानुनी राज्यको भावनाअनुसार गृह प्रशासनलाई शान्ति, विकास र समृद्धिको आधारका रूपमा अघि बढाउने बताए।

यस्तै, जाजरकोट, रुकुम पश्चिमलगायत भूकम्प प्रभावित क्षेत्रमा क्षतिग्रस्त निजी आवास र सरकारी संरचनाको पुनर्निर्माणका लागि आवश्यक बजेट तथा स्रोत व्यवस्थापन गरिएको उनले जानकारी दिए।