७ श्रावण, काठमाडौं ।  उत्तरपश्चिमी नाइजेरियाको जामफरा राज्यका विभिन्न गाउँमा बुधबार सशस्त्र बन्दुकधारी समूहले गरेको शृङ्खलाबद्ध आक्रमणमा कम्तीमा २३ जनाको मृत्यु भएको छ।

अधिकांश मृतक खेतमा काम गरिरहेका किसान हुन्।पछिल्लो घटनाले वर्षौंदेखि यस क्षेत्रमा सक्रिय आपराधिक सशस्त्र गिरोहका कारण उत्पन्न असुरक्षालाई पुनः उजागर गरेको छ।

आक्रमणमा घाइते भएका तीन जनालाई प्रारम्भमा तलाटा माफारा जनरल अस्पतालमा उपचारका लागि भर्ना गरिएको थियो।

उनीहरूको अवस्था गम्भीर भएपछि थप उपचारका लागि छिमेकी सोकोटो राज्यस्थित शिक्षण अस्पतालमा रेफर गरिएको छ । घटनाबारे प्रतिक्रिया माग्दा नाइजेरियाली प्रहरीले तत्काल कुनै टिप्पणी गरेको छैन।