०७ श्रावण, काठमाडौं । नेकपा नेता नारायणकाजी श्रेष्ठले विगतका कम्युनिस्ट एकता प्रयास असफल भए पनि भविष्यमा पुनः एकताको सम्भावना समाप्त नभएको बताएका छन् ।

४८ औँ पुष्पलाल स्मृति दिवसका अवसरमा नेकपा एमालेको राजधानी प्रदेश कमिटीले आयोजना गरेको कार्यक्रममा बोल्दै श्रेष्ठले कम्युनिस्ट आन्दोलनलाई पुनर्गठन र रूपान्तरण गर्दै अन्ततः एउटै केन्द्र निर्माण गर्नुपर्ने धारणा राखे । उनले विगतको असफलतालाई आधार बनाएर सधैं एकता असम्भव ठान्न नहुने बताउँदै त्यसबाट शिक्षा लिएर वस्तुगत आधार तयार गर्नुपर्ने उल्लेख गरे । श्रेष्ठले वाम एकताको विषयमा बाह्य दबाब वा प्रतिक्रियावादी शक्तिको डर देखाएर पछि हट्न नहुने बताए । व्यक्तिगत भूमिका र हैसियतभन्दा देश, लोकतन्त्र र वाम आन्दोलनको भविष्यलाई प्राथमिकता दिनुपर्ने उनको भनाइ थियो।

तत्काल पार्टी एकताको परिस्थिति बनिनसकेको स्वीकार गर्दै श्रेष्ठले सहकार्य विस्तार, पार्टीहरूको रूपान्तरण र पुनर्गठन हुँदै दीर्घकालमा एउटै कम्युनिस्ट केन्द्र निर्माण गर्ने लक्ष्य राख्नुपर्ने बताए । उनले भविष्यको एकीकृत कम्युनिस्ट केन्द्रले मार्क्सवाद र समाजवादको मूल दिशालाई कायम राख्दै बदलिँदो समयअनुसार विचार, संगठन र कार्यशैलीमा सुधार गर्नुपर्ने धारणा पनि राखे ।