०७ श्रावण, काठमाडौं । नेकपा एमालेका अध्यक्ष तथा पूर्वप्रधानमन्त्री केपी शर्मा ओलीले कम्युनिस्ट नेता पुष्पलाल श्रेष्ठ र नेपाली कांग्रेसका नेता बीपी कोइरालाले नेपालको राजनीतिक तथा सामाजिक परिवर्तनमा महत्वपूर्ण योगदान दिएको बताएका छन्।

पुष्पलालको ४८औँ स्मृति दिवसका अवसरमा सन्देश जारी गर्दै ओलीले दुवै नेताको संघर्ष, विचार र योगदानबाट प्रेरणा लिएर अघि बढ्ने प्रतिबद्धता व्यक्त गरे । ओलीले पुष्पलाललाई कम्युनिस्ट पार्टीका संस्थापक मात्र नभई नेपाली राजनीतिका विश्लेषक, चिन्तक र राजनीतिक साहित्यका महत्वपूर्ण व्यक्तित्वका रूपमा स्मरण गरे । उनले राणा शासन, पञ्चायती व्यवस्था र निरंकुश राजतन्त्रविरुद्धका आन्दोलनमा पुष्पलालको योगदान उल्लेखनीय रहेको बताए । लोकतान्त्रिक र प्रगतिशील शक्तिहरूबीच सहकार्य गर्नुपर्ने पुष्पलालको विचारकै आधारमा २०४६ सालको राजनीतिक परिवर्तन सम्भव भएको ओलीको दाबी थियो। उनले पुष्पलालका विचार र मदन भण्डारीले अघि सारेको जनताको बहुदलीय जनवाद आज पनि सान्दर्भिक रहेको उल्लेख गरे । 

बीपी कोइरालालाई पनि स्मरण गर्दै ओलीले उहाँलाई बहुआयामिक प्रतिभाका धनी राजनीतिज्ञ तथा साहित्यकारका रूपमा चित्रण गरे । दुवै नेताको संघर्ष, जेल र निर्वासनको अनुभवले नेपाली समाजलाई निरन्तर प्रेरणा दिइरहेको उनको भनाइ थियो। ओलीले कम्युनिस्ट आन्दोलनले पछिल्लो समय चुनौती सामना गरे पनि अग्रज नेताहरूको विचार र त्यागबाट पुनः अघि बढ्ने विश्वास व्यक्त गरे ।