९ श्रावण, काठमाडौं ।  आमाको उपचारका लागि अस्पतालमा बसेका बेला आफैंलाई सिसाले प्रहार गरेका मोरङको लेटाङ नगरपालिका–२ का ४० वर्षीय राजेन्द्र राईको उपचारका क्रममा मृत्यु भएको छ ।

राजेन्द्रले विराटनगरको गोल्डेन अस्पताल परिसरमा आफ्नै पेटमा सिसा प्रहार गरेका थिए । पेटमा सिसा प्रहार गरेपछि गम्भीर घाइते भएका राजेन्द्रको गोल्डेनमै उपचार भइरहेको थियो ।

प्रहरीका अनुसार राजेन्द्र आफ्नी ६९ वर्षीया आमा राम्रिका राईको उपचारका लागि गोल्डेन अस्पतालमा बसेका थिए । साउन २ गते बिहान करिब ६ बजे अस्पतालको पछाडिपट्टि पुगेका उनले घरको झ्यालमा प्रयोग हुने सिसाले आफ्नै पेटमा प्रहार गरेका थिए । 

गम्भीर घाइते भएका राजेन्द्रलाई तत्काल गोल्डेन अस्पतालमै उपचारका लागि भर्ना गरिएको थियो । उपचारकै क्रममा शुक्रबार साँझ करिब ७ बजे उनको मृत्यु भएको हो ।  राजेन्द्रले यस्तो कदम किन चाले भन्ने विषय खुल्न नसकेको प्रहरीले जनाएको छ ।