१६ श्रावण, काठमाडौं । नेपाल प्रहरीले साम्प्रदायिक तथा सामाजिक सद्भावमा खलल पुर्‍याउने गतिविधिमा संलग्न ६५ जनालाई पक्राउ गरेको छ ।

साउन १३ गतेदेखि आज बिहान ९ बजेसम्मको अवधिमा तराईका विभिन्न ७ जिल्लाबाट उनीहरूलाई नियन्त्रणमा लिइएको हो । पक्राउ पर्नेमा धनुषाबाट सबैभन्दा धेरै ४५ जना, सर्लाहीबाट ९ जना, सिरहाबाट ५ जना, महोत्तरी र सुनसरीबाट २–२ जना तथा पर्सा र सप्तरीबाट १–१ जना रहेका छन् ।

पक्राउ परेकाहरूमाथि सामाजिक सुव्यवस्था विरुद्धको कसुर वा सम्बन्धित कानुन अनुसार आवश्यक अनुसन्धान र कानुनी कारबाही अगाडि बढाइएको प्रहरीले जनाएको छ।

पछिल्लो केही दिनयता तराईका जिल्लाहरूमा देखा परेको साम्प्रदायिक तनाव र सामाजिक सद्भाव बिथोल्ने प्रयासलाई नियन्त्रण गर्न प्रहरीले सक्रियता बढाएको छ।