१७ श्रावण, काठमाडौं । इरानी विदेशमन्त्री अब्बास अराघचीले टर्की, पाकिस्तान र साउदी अरेबियाका विदेशमन्त्रीहरूसँग छुट्टाछुट्टै टेलिफोन वार्ता गरेका छन् ।

उनले अमेरिका वा इजरायलबाट हुने कुनै पनि आक्रमणको निर्णायक र समानुपातिक जवाफ दिइने चेतावनी दिएका छन् । इरानी सरकारी स्रोतहरूका अनुसार अराघचीले विशेष गरी साउदी विदेशमन्त्री फैसल बिन फर्हान अल साउदसँगको कुराकानीमा इरानको ऊर्जा पूर्वाधारमाथि सम्भावित आक्रमणबारे गम्भीर चिन्ता व्यक्त गरेका थिए ।

उनले अमेरिका वा इजरायलले इरानका ऊर्जा पूर्वाधारलाई निशाना बनाए त्यसको कडा प्रतिकार गरिने चेतावनी दिएका छन् । साथै, त्यस्ता आक्रमणमा प्रत्यक्ष वा अप्रत्यक्ष रूपमा सहयोग गर्ने खाडी देशका मुलुकहरू पनि इरानको जवाफी कारबाहीको दायरामा पर्न सक्ने चेतावनी दिए ।

इरानको उच्च नेतृत्वले यसअघि पनि आफ्नो ऊर्जा पूर्वाधारमाथि आक्रमण भए खाडी क्षेत्रभर रहेका तेल तथा ग्यास पूर्वाधारलाई निशाना बनाउन सकिने चेतावनी पटक–पटक दिँदै आएको छ ।

यता, अमेरिकी राष्ट्रपति डोनाल्ड ट्रम्पले इरानमाथि कडा सैन्य कारबाही हुन सक्ने चेतावनी दिएको एक दिनपछि मध्यपूर्वस्थित अमेरिकी दूतावासहरूले आफ्ना नागरिकहरूलाई सम्भावित सुरक्षा जोखिमप्रति सतर्क रहन आग्रह गरेका छन् ।