२० श्रावण, काठमाडौं । राष्ट्रिय प्रजातन्त्र पार्टी (राप्रपा) ले प्रदेश सरकारमा सहभागी हुने वा नहुने विषयमा आवश्यक निर्णय गर्ने अधिकार पार्टी अध्यक्ष राजेन्द्र लिङ्देनलाई दिएको छ।

बुधबार धुम्बाराहीस्थित पार्टी केन्द्रीय कार्यालयमा बसेको केन्द्रीय कार्यसम्पादन समितिको बैठकले प्रदेश सरकार गठन र बदलिँदो राजनीतिक समीकरणलाई नजिकबाट अध्ययन गर्दै आवश्यक परे उपयुक्त समयमा निर्णय लिने निष्कर्ष निकालेको हो। बैठकपछि सञ्चारकर्मीसँग कुरा गर्दै अध्यक्ष लिङ्देनले राप्रपा हालसम्म प्रदेश सरकार गठनका लागि चलिरहेका सत्ताकेन्द्रित गतिविधिमा संलग्न नभएको स्पष्ट पारे। उनले नेपाली कांग्रेस, नेकपा एमाले र नेकपाबीच विकसित सत्ता समीकरणमा पार्टीको तत्काल कुनै भूमिका नरहेको बताए। यद्यपि, राजनीतिक परिस्थिति परिवर्तन भएर पार्टीले औपचारिक निर्णय लिनुपर्ने अवस्था आएमा त्यसबारे निर्णय गर्ने सम्पूर्ण अधिकार अध्यक्षलाई प्रदान गरिएको उनले जानकारी दिए।

राप्रपाले अहिलेको अवस्थालाई प्रतीक्षा र मूल्याङ्कनको चरणका रूपमा लिएको जनाउँदै, बदलिँदो राजनीतिक समीकरणअनुसार पार्टीले आफ्नो भूमिका समयानुकूल निर्धारण गर्ने संकेत दिएको छ।