२६ श्रावण, काठमाडाैं । नेपाली काँग्रेसकी सांसद शाहजान खातुनले स्वास्थ्यकर्मीहरूको सुरक्षा सुनिश्चित गर्न र स्वास्थ्य क्षेत्रका विद्यमान समस्या समाधान गर्न सरकारकको ध्यानाकर्षण गराएका छन् ।

मंगलवार बसेको प्रतिनिधि सभाको बैठकमा बोल्दै सांसद खातुनले स्वास्थ्यकर्मीमाथि हातपात र दुव्र्यवहार गर्नेलाई ‘जेल विदाउट बेल’ (धरौटीबिनाको जेल) को कानूनी व्यवस्था गर्न माग गरेका हुन् । सदनलाई सम्बोधन गर्दै सांसद खातुनले कोभिड-१९ को कठिन समयमा स्वास्थ्यकर्मीले खेलेको जोखिमपूर्ण भूमिकाको स्मरण गरे । सांसद खातुनले कालिकोटको पलाता अस्पतालदेखि वीरगन्जको नारायणी अस्पतालसम्म स्वास्थ्यकर्मीहरूले असुरक्षित वातावरणमा काम गर्नुपरेको उल्लेख गरे । न्युन पारिश्रमिक, अत्यधिक कार्यबोझ, र सेवा सुविधाको अभावका बीच पनि सेवामा खटिएका चिकित्सक तथा नर्सहरूमाथि अस्पतालभित्रै हुने धम्की र हातपातका घटनाले उनीहरूको मनोबल गिरेको उनको तर्क छ । उनले भने,‘कोभिडको समयमा जब आफन्तले आफन्तको साथ छोडेका थिए, तब स्वास्थ्यकर्मीले नै आफ्नो ज्यान जोखिममा राखेर बिरामीको सेवा गरे । त्यतिबेला ‘फ्रन्टलाइन हिरो’ भन्दै ताली बजाइएका स्वास्थ्यकर्मी आज आफ्नै कार्यक्षेत्रमा असुरक्षित हुनु दुःखद् छ । एउटा चिकित्सक बन्न वर्षौंको मेहनत र करोडौँ खर्च लाग्छ । तर आज दक्ष जनशक्ति देशमै बसेर सेवा गर्ने वातावरण नपाउँदा विदेशिन बाध्य छन् । मेडिकल कलेजका मेरुदण्ड मानिने इन्टर्न र रेसिडेन्ट चिकित्सकहरूको स्टाइपेन्ड र समयको सुनिश्चितता हुन सकेको छैन ।’

उनले स्वास्थ्यकर्मीको तलब, जोखिम भत्ता, बिमा र सुरक्षित आवासको व्यवस्था गर्न सरकारसँग आग्रह गरे । स्वास्थ्यकर्मीलाई सुरक्षित राख्नु भनेको समग्र नागरिकको स्वास्थ्य प्रणालीलाई सुरक्षित राख्नु भएको उनको भनाइ छ ।–न्युज एजेन्सी नेपाल