०१ भदाै, काठमाडाैं । राष्ट्रिय सभामा नेपाली कम्युनिष्ट पार्टीकी सांसद राजेन्द्रलक्ष्मी गैरेले मुलुकमा आइपरेका प्राकृतिक विपत्ति, बढ्दो महँगी र सुरक्षा चुनौतीका विषयमा सरकार गम्भीर नभएको भन्दै आलोचना गर्नुभएको छ ।

सोमवार बसेको राष्ट्रिय सभाको बैठकमा बोल्दै सांसद गैरेले सरकारले आफ्नो अभिभावकीय भूमिका निर्वाह गर्न नसकेको र जनजीवनका आधारभुत समस्याप्रति उदासीन रहेको आरोप लगाउनुभएको हो । सांसद गैरेले गत साउन २७ गते रोल्पाको थवाङ गाउँपालिका–५ मा पहिरोका कारण दर्जनौँ व्यक्तिको मृत्यु र कैयौँ बेपत्ता भएको हृदयविदारक घटना स्मरण गर्दै पीडितले अझै राहत नपाएको बताइन् । उहाँले नवलपरासी पश्चिमको सुस्तामा नारायणी नदीका कारण भएको डुबानतर्फ पनि सरकारको ध्यानाकर्षण गराउनु भयो । काठमाडौं लगायत मुलुकभर बढ्दो महँगीले जनजीवन कष्टकर बनेको तर्फ इंगित गर्दै गैरेले बजारमा ग्यास, फलफूल, तरकारी र खाद्यान्नको मूल्य अत्यधिक बढेको बताइन् । उहाँले भन्नुभयो, ‘विपद्का बेला स्थानीय सरकारलाई स्रोत–साधनले सम्पन्न बनाएर परिचालन गरेको भए धेरैको ज्यान जोगाउन सकिन्थ्यो । भूकम्पपीडितले अझै राहत पाएका छैनन्, तर सरकार यस्ता गम्भीर विषयमा संवेदनशील देखिएन । विपद् परेका बेला गृहमन्त्री घटनास्थलमा पुगेर उद्धारमा खटिएको सुन्न पाइएन । बरु उहाँ अन्यत्रै गएर खानेपानीको कुरा गर्दै हिँड्नुभएको सुनिन्छ । जहाँ आपत् पर्छ, सरकार त्यहीँ उभिनुपर्ने हो । विद्यार्थी र डेरा गरी बस्नेहरूलाई बाँच्न गाह्रो भइसक्यो, तर सरकारको तर्फबाट प्रभावकारी बजार अनुगमन भएको छैन ।’ 

सांसद गैरेले पछिल्लो समय प्रविधिको प्रयोग गरी सर्वसाधारण लुटिने क्रम बढेकोमा चिन्ता व्यक्त गर्नुभयो । –न्युज एजेन्सी नेपाल