०१ भदाै, काठमाडाैं । नेपाल विद्युत प्राधिकरणका का.मु. कार्यकारी निर्देशक दीर्घायूकुमार श्रेष्ठले लोडसेडिङको अँध्यारो युग पार गर्दै नेपालले विद्युत उत्पादन, प्रसारण, वितरण र निर्यातमा उल्लेख्य उपलब्धि हासिल गरेको बताउनुभएको छ ।

नेपाल विद्युत प्राधिकरणको ४१ औँ वार्षिकोत्सबका अवसरमा सोमवार आयोजित कार्यक्रममा उहाँले यस्तो बताउनुभएको हो । उहाँले हाल विद्युत प्रशारण ग्रिड करिव ९८ प्रतिशत जनसंख्यामा पुगेको बताउनुभयो । प्रतिव्यक्ति विद्युत खपतसमेत अघिल्लो वर्षको तुलनामा बढेको उहाँले जानकारी दिनुभयो । उहाँले विद्युत प्रणालीको विस्तारसँगै सेवा गुणस्तर, विश्वसनीयता र आन्तरिक खपत बढाउन थप सुधार आवश्यक रहेको बताउनु भयो । उहाँकाअनुसार प्राधिकरण र निजी क्षेत्रको सहकार्यमा नेपालमा विद्युत उत्पादन क्षमता ४ हजार १२० मेगावाट पुगेको छ । त्यस्तै, निजी क्षेत्रसँग १२ हजार १३५ मेगावाट क्षमताको विद्युत खरिद सम्झौता (पीपीए) सम्पन्न भइसकेको उहाँले जानकारी दिनुभयो । उत्पादन बढ्दै जाँदा विद्युत खेर जान नदिन आन्तरिक खपत वृद्धि र अन्तरदेशीय विद्युत व्यापारलाई समेत प्राथमिकता दिएको उहाँले बताउनुभयो । भारत र बंगलादेशतर्फ विद्युत निर्यात गर्दै प्राधिकरणले गत आर्थिक वर्षमा मात्रै २९ अर्ब ३१ करोड रुपैयाँ आम्दानी गरेको उहाँले जानकारी दिनुभयो ।
उहाँले भन्नुभयो, ‘लोडसेडिङका ती अस्तव्यस्त दिनहरू इतिहास भई आजको दिनमा विद्युत प्रसारण ग्रिड करिव ९८ प्रतिशत जनतामा पुगेको छ भने प्रति व्यक्ति विद्युत खपत समेत गत वर्षभन्दा बढेको छ । बाढी, पहिरो, हावाहुरी जस्ता प्राकृतिक विपत्तिले बेला बखत विद्युत आपूर्तिमा गर्ने क्षणिक अवरोधलाई विद्युत पूर्वाधारको सुदृढीकरण र विस्तार मार्फत न्युनिकरण गर्दै विद्युत सेवाको गुणस्तर र विश्वसनीयता अभिवृद्धि गर्ने र ग्राहक सेवामा सुधार ल्याउने रणनीतिका साथ प्राधिकरण अघि बढिरहेको छ । प्राधिकरण र निजी क्षेत्रको सहकार्यमा देश भित्रै विद्युतको जडित उत्पादन क्षमता ४ हजार १२० मेगावाट पुगेको छ भने १२ हजार १३५ मेगावाट क्षमताको विद्युत खरिदका लागि निजी क्षेत्रसँग पीपीए पनि भइसकेको छ । स्वदेश भित्रै विद्युत खपत वृद्धि गर्दै थप उत्पादनलाई स्पिल हुन नदिन भारत र बंगलादेशमा विद्युत निर्यात गर्ने सन्दर्भमा एनइएले गत आर्थिक वर्षमा विद्युत निर्यात बापत मात्र २९ अर्ब ३१ करोड आम्दानी गर्न सफल भएको छ । यसबाट राष्ट्रिय अर्थतन्त्रमा महत्वपूर्ण योगदान पुग्नका साथै विश्व बजारमा नेपाललाई खुद विद्युत निर्यात गर्ने देशको रूपमा चिनाएको छ । विभिन्न जलाशय, सौर्य र अर्ध जलाशय विद्युत आयोजनाहरूको प्रवर्धन, प्रसारण लाइनमा समेत निजी क्षेत्रलाई सहभागी गराउने नीति, उत्पादन प्रसारण र वितरणका प्रणालीको आधुनिकीकरण, गुणस्तरीय सेवा प्रतिको प्रतिबद्धता, जवाफदेहिता र सञ्चालन दक्षता अभिवृद्धिले एनइएलाई जनताको विश्वासिलो साथी बनाएको छ । यस घडीमा निजी क्षेत्रका उत्पादकहरूको योगदानलाई कदाचित नजरअन्दाज गर्न मिल्दैन । अब हामीले हासिल गरेका यी उपलब्धिहरूमा सन्तुष्ट भएर बस्नु हुँदैन । अझ विश्वसनीय गुणस्तरीय दिगो र भरपर्दो विद्युत आपूर्ति सुनिश्चित गर्न, चुहावट थप घटाउन, देश भित्रै विद्युतको खपत बढाई आर्थिक र सामाजिक मूल्य सिर्जना गर्न अनि हरित ऊर्जाको युगमा देशलाई अग्रणी बनाउन हामी सबै एकजुट भई थप इमान्दार नवीनतम र आधुनिक प्रविधिसँग अभ्यस्त हुँदै संस्था र जनता प्रति अझ उत्तरदायी हुनै पर्दछ ।’

उहाँले प्राधिकरणको आगामी प्राथमिकता उत्पादन विस्तारसँगै विद्युत प्रणालीलाई थप विश्वसनीय र आधुनिक बनाउनु रहेको बताउनु भयो । जलाशय, सौर्य तथा अर्धजलाशययुक्त आयोजनाको प्रवर्धन, प्रसारण लाइन निर्माणमा निजी क्षेत्रको सहभागिता, उत्पादन–प्रशारण–वितरण प्रणालीको आधुनिकीकरण र चुहावट नियन्त्रणलाई अगाडि बढाउनुपर्नेमा उहाँले जोड दिनुभयो । उहाँले हालको उपलब्धिमा सन्तुष्ट भएर बस्ने अवस्था नरहेको पनि बताउनुभयो । उहाँका अनुसार देशभित्रै विद्युत खपत बढाएर आर्थिक तथा सामाजिक मूल्य सिर्जना गर्ने, विद्युत चुहावट थप घटाउने र हरित ऊर्जाको युगमा नेपाललाई अग्रणी मुलुक बनाउनेतिर लाग्नुपर्ने बताउनु भयो ।–न्युज एजेन्सी नेपाल