३ भदौ, काठमाडौं । टिकटकले प्रयोगकर्ताहरूलाई डाइरेक्ट मेसेज (डीएम)मार्फत एकअर्कालाई पैसा पठाउन सकिने सुविधा ल्याउनेबारे परीक्षण गरिरहेको खुलेको छ ।

यो सुविधा कार्यान्वयनमा आएमा सामाजिक सञ्जालबाट वित्तीय सेवातर्फ आफ्नो विस्तारलाई थप अघि बढाउने टिकटकको प्रयास सफल हुने देखिएको छ । ब्लुमबर्गमा प्रकाशित रिपोर्ट अनुसार विकासकै क्रममा रहेको यो सुविधा सार्वजनिक भएमा कारोबार व्यवस्थापनका लागि दक्षिणपूर्वी एसियामा यसअघि नै उपलब्ध ‘टिकटक पे’ सेवा प्रयोग गरिनेछ ।

टिकटकको अमेरिकी आईफोन एपको हालको संस्करणभित्र लुकाइएको कोडमा यससम्बन्धी प्रमाण भेटिएको हो ।कोडमा उल्लेख भए अनुसार, प्रयोगकर्ताले आफूलाई पठाइएको रकम तोकिएको समयसीमाभित्र ‘ट्याप टु एक्सेप्ट’ गरेर स्वीकार गर्न सक्नेछन् ।

रकम पठाउने व्यक्तिले पनि कारोबारको अवस्थाबारे पुस नोटिफिकेसन वा इनबक्समार्फत जानकारी पाउनेछन् ।त्यसैगरी, रकम पठाउँदा त्यससँगै सन्देशसमेत जोड्न सकिने सुविधाको सङ्केत कोडमा भेटिएको छ । यो सुविधा पेपालको भेनमो सेवामा रकम पठाउँदा लेख्न मिल्ने सन्देश वा क्याप्सनजस्तै हुनेछ ।

टिकटकले प्रयोगकर्ताबीच रकम पठाउने यो सुविधा अन्ततः सार्वजनिक गर्ने कुनै ग्यारेन्टी भने छैन । यद्यपि, यसका लागि भइरहेको इन्जिनियरिङसम्बन्धी कामले टिकटकको विश्वव्यापी मातृ कम्पनी बाइटडान्स लिमिटेडले यस्तो सेवा विस्तार गर्ने सम्भावनाबारे खोजी गरिरहेको देखाउँछ ।