५ भदौ, काठमाडौं ।  पूर्वी इन्डोनेसियामा शक्तिशाली भूकम्प गएको तीन दिनपछि एकजना ८४ वर्षीया वृद्धालाई उनको घरको भग्नावशेषबाट जीवितै उद्धार गरिएको छ ।

शनिबार बिहान इन्डोनेसियाको फ्लोरेस टापुमा ७.७ म्याग्निच्युडको भूकम्प गएको थियो ।  भूकम्पमा परेर कम्तीमा ७३ जनाको मृत्यु भएको थियो भने ९०० भन्दा बढी मानिसहरू घाइते भएका थिए । त्यस्तै, लगभग ६०,००० जना विस्थापित भएका थिए ।

भूकम्पपछि गएको पहिरोले नितुङलिया गाउँ जाने बाटो अवरुद्ध हुँदा  ८४ वर्षीया पाउलिना पोबी तीन दिनसम्म भत्किएको घरको बाँसको पर्खालमुनि पुरिएकी थिइन् ।

पक्षाघातका कारण उनी चल्न र बोल्न नसक्ने भएकाले परिवारले मंगलबार मात्र उनलाई फेला पारेको थियो। उद्धारपछि उनलाई उपचारका लागि नजिकैको स्वास्थ्य केन्द्र लगिएको छ।