०७ भदाै, काठमाडाैं । जेन–जी आन्दोलनका शहीद परिवार र घाइतेहरूले जेन–जी आन्दोलनका शहीदको स्मृतिमा भदौ २३ गते ‘स्मृति दिवस’ बनाएका छन् । 

जेन–जी शहीद परिवार कल्याणकारी समाज र घाइते जेन–जी नेपाल संयुक्त संघर्ष समितिले आईतवार काठमाडौंमा पत्रकार सम्मेलनको आयोजना गर्दै यस्तो जानकारी दिएको हो । पत्रकार सम्मेलनमा बोल्दै जेन–जी शहीद श्रीयम चौलागाईंका पिता तथा जेन–जी शहीद परिवार कल्याणकारी समाजका कोषाध्यक्ष गणेशप्रसाद चौलागाईंले उक्त स्मृति दिवस बानेश्वरस्थित पुरानो संसद भवन परिसरमा आयोजना गरिने जानकारी दिनुभयो । उहाँले स्मृति दिवस कार्यक्रमको सम्पूर्ण व्यवस्थापन र खर्च सरकारले सरकारले व्यहोेर्नुपर्ने बताउनु भयो । उहाँले शहीदका परिवार तथा घाइतेहरु आर्थिक रुपमा कमजोर रहेको उल्लेख गर्दै कार्यक्रम व्यव्स्थापनको सम्पूर्ण जिम्मेवारी सरकारले लिनुपर्ने माग गर्नुभयो । उहाँले संयुक्त समितिले आगामी असोज १५ गतेदेखि सोही संसद भवनभित्र सात दिने महायज्ञ सञ्चालन गर्ने योजना रहेको समेत बताउनु भयो । उहाँले महायज्ञको सम्पूर्ण व्यवस्थापनको जिम्मेवारी पनि सरकारले लिनुपर्ने माग गर्नुभयो । उहाँले भन्नुभयो,‘हामी जेनजी आन्दोलनका शहीदको स्मृतिमा यही भदौ २३ गते स्मृति दिवस मनाउँदैछौँ । आन्दोलनको क्रममा जलाइएको बानेश्वरस्थित संसद भवनभित्रै स्मृति दिवस मनाउँदैछौँ । हामी जेन–जी शहीद र घाइतेको परिवार आर्थिक रुपमा त्यति बलियो छैन । त्यसकारण सरकारले यो कार्यक्रमको सबै कुराको स्वामित्व लिओस् । तर आयोजक भने शहीद परिवार र घाइते नै हुन्छन् । र हाम्रो अर्को कार्यक्रम पनि छ आउँदो असोज १५ गतेदेखि हामी ७ दिने महायज्ञ पनि लगाउँदैछौँ । त्यो महायज्ञ समेत त्यही भवनभित्र लगाउनेछौँ । त्यसको पनि सम्पूर्ण व्यवस्थापनको जिम्मेवारी समेत सरकार सरकारले लिनुपर्छ ।  मैले यो विषयमा गृहमन्त्रीसँग छलफल गरेको थिएँ । उहाँले यो विषयमा प्रधानमन्त्रीज्यूसँग छलफल गरेर जानकारी गराउँछु भन्नुभएको थियो । तर अहिलेसम्म पनि जानकारी गराउनुभएको छैन ।’

जेन–जी शहीदको स्मृति दिवस मनाउने सम्बन्धमा गृहमन्त्री सुधन गुरुङसँग छलफल भइरहेको समेत उहाँले जानकारी दिनुभयो । सरकारले यसअघि नै प्रत्येक वर्ष भाद्र २३ गतेलाई जेन–जी शहीद दिवसको रुपमा मनाउने निर्णय गरिसकेको छ ।–न्युज एजेन्सी नेपाल