२० भदौ, काठमाडौं । भोटेकोशीमा आएको विनाशकारी बाढीपछि १०औँ र ११औँ दिनमा चार जनाको जीवितै उद्धार भएको छ।

जलविद्युत आयोजनाका सुरुङ तथा बाढीले क्षति पुर्‍याएका संरचनामा फसेकाहरूको खोजी जारी रहेकै बेला पछिल्ला दुई दिनमा भएको उद्धारले आशा जगाएको छ। शुक्रबार त्रिशूली-३ ए जलविद्युत आयोजनाको सुरुङबाट सञ्जय साह र कविर महर्जनको उद्धार गरिएको थियो। शनिबार अपर त्रिशूली-१ बाट एक चिनियाँ नागरिक तथा नुवाकोटको विदुर नगरपालिका-१० बेत्रावतीस्थित क्षतिग्रस्त घरबाट चण्डिका श्रेष्ठको जीवितै उद्धार गरिएको हो। बेत्रावतीमा आनन्द श्रेष्ठको घरमा अड्किएकी चण्डिकालाई सशस्त्र प्रहरी बलका इन्स्पेक्टर सुमन विकको कमान्डमा रहेको टोलीले उद्धार गरेको थियो। उनी उद्धारका क्रममा अचेत अवस्थामा भेटिएकी थिइन्।

भोटेकोशी बाढी प्रभावित क्षेत्रमा रहेका अधिकांश जलविद्युत आयोजनामा बाढीका बेला काम भइरहेको थियो। तीमध्ये धेरै आयोजनाका सुरुङमा काम भइरहेकाले अझै ठूलो संख्यामा मानिस फसेको आशंका गरिएको छ। सुरुङभित्र फसेकाहरूको अवस्था पत्ता लगाउन सुरक्षाकर्मी तथा प्राविधिक टोलीले प्रयास जारी राखेका छन्। तर सुरुङमा थुप्रिएको ढुंगा, माटो र लेदो तथा संरचनागत जटिलताका कारण उद्धारकर्तालाई धेरै स्थानमा पुग्न कठिन भइरहेको छ। गृहमन्त्री सुधन गुरुङले पनि उद्धार टोली परिचालन गरेर खोजी कार्य जारी रहेको बताएका छन्।

यसैबीच, सुरुङमा मात्रै मानिस फसेको हुनसक्ने अनुमानलाई बाढीले क्षति पुर्‍याएका घरमा भएको पछिल्लो उद्धारले थप चुनौतीपूर्ण बनाएको छ। चण्डिकाको उद्धारपछि बाढीले पुरिएका, पल्टिएका वा क्षतिग्रस्त घरका संरचनाभित्र समेत मानिस फसेको हुनसक्ने आशंका बढेको हो। रसुवागढीदेखि धादिङको गलौंदी क्षेत्रसम्म बाढीले थुप्रै घरमा क्षति पुर्‍याएको छ। कतिपय घर पुरिएका छन् भने केही पूर्णरूपमा पल्टिएका छन्। त्यसैले जलविद्युत आयोजनाका सुरुङसँगै बाढी प्रभावित बस्तीका क्षतिग्रस्त संरचनामा समेत खोजी केन्द्रित गर्नुपर्ने अवस्था देखिएको छ। दिन बित्दै जाँदा बेपत्ताको परिवारमा चिन्ता बढिरहेको छ। यद्यपि, विपत्तिको ११ दिनपछि समेत चार जनाको जीवित उद्धार हुनुले अझै कोही जीवित अवस्थामा फेला पर्न सक्ने आशा भने कायम राखेको छ।