२६ भदौ, काठमाडौं ।  धादिङको गजुरी गाउँपालिका–६ जहरेखेत पुलनजिकै बस र ट्रक एकआपसमा ठोक्किँदा चार जना घाइते भएका छन् ।

शुक्रबार बिहान करिब १०ः३० बजे पृथ्वी राजमार्गअन्तर्गत काठमाडौँबाट धादिङबेँसीतर्फ आउँदै गरेको बा ४ ख ८६६७ नम्बरको यात्रुवाहक बस र विपरीत दिशाबाट जाँदै गरेको ना ५ ख ७४१४ नम्बरको ट्रक आपसमा ठोक्किएका हुन् ।

दुर्घटनामा धादिङको ज्वालामुखी गाउँपालिका–२ की ८० वर्षीया दिवाकुमारी दानी र ५० वर्षीया धनकुमारी केसी घाइते भएका छन् । मध्यम अवस्थामा रहेका उनीहरूलाई थप उपचारका लागि काठमाडौँस्थित राष्ट्रिय ट्रमा सेन्टर रिफर गरिएको प्रहरीले जनाएको छ ।

यस्तै, बसका सहचालक गल्छी गाउँपालिका–१ का १७ वर्षीय रामचन्द्र परियारको बायाँ आँखामा चोट लागेको छ भने बस चालक नुवाकोटको विदुर नगरपालिका–७ का ३३ वर्षीय समियाल तामाङको दुवै खुट्टा र कम्मरमा चोट लागेको छ। उनीहरू दुवैको धादिङ अस्पताल आदमघाटमा उपचार भइरहेको छ।