२७ भदौ, काठमाडौं । इलामको फाकफोकथुम गाउँपालिका–६ हाङ्मासुलीमा अटो दुर्घटना हुँदा २ जनाको मृत्यु भएको छ ।

मृत्यु हुनेमा २७ वर्षीया कविता श्रेष्ठ र उनकी करिब ८ वर्षीया छोरी सुस्मिता श्रेष्ठ रहेकी छन् । उनीहरूको उपचारका क्रममा झापाको बी एन्ड  सी अस्पतालमा मृत्यु भएको हो ।

शुक्रबार साँझ पोखरी–कमेरे भित्री कच्ची सडकखण्डमा मधेश प्रदेश ०३–००३ ह ६९६७ नम्बरको अटो अनियन्त्रित भई सडकबाट करिब दुई मिटर तल खसेर आगलागी भएको थियो । दुर्घटनामा अटो चालकसहित छ जना घाइते भएका थिए ।

घाइतेमध्ये सुस्मिता श्रेष्ठको शुक्रबार साँझ ८ः१५ बजे र उनकी आमा कविताको शनिबार बिहान ६ बजे सोही अस्पतालमा मृत्यु भएको हो ।

दुर्घटनामा गम्भीर घाइते अटो चालक फाकफोकथुम–६ पोखरी बजारका करिब ३५ वर्षीय लोकबहादुर श्रेष्ठसहित अन्य तीन जनाको उपचार भइरहेको छ ।