०४ असाेज, काठमाडाैं । सत्तारुढ राष्ट्रिय स्वतन्त्र पार्टी (रास्वपा) को मधेस प्रदेश महाधिवेशन हुन नसक्नुका कारणबारे छानबिन गर्न गठित ‘अडिट समिति’ले प्रारम्भिक प्रतिवेदन बुझाएको छ । 

आईतवार पार्टी केन्द्रिय कार्यालय चःमतीमा बसेको सचिवालय बैठकमा समिति संयोजक तथा पार्टी सहमहामन्त्री हरि ढकालले प्रारम्भिक प्रतिवेदन बुझाउनुभएको प्रवक्ता जगदीश खरेलले जानकारी दिनुभयो । यसअघि सांसदहरुको दबाब र जातीय समस्याको कारण मधेस प्रदेशमा अधिवेशन हुन सकेको छैन । मधेस प्रदेशका आठ जिल्लामध्ये पर्सामा मात्र महाधिवेशन सम्पन्न भएको छ । प्रवक्ता खरेलकाअनुसार समितिले प्रारम्भिक प्रतिवेदन बुझाएपनि विस्तृत प्रतिवेदन तयार भइरहेको बताउनु भयो । बैठकले पार्टीका केही विभागमा सदस्य मनोनयन गर्ने निर्णय समेत गरको उहाँको भनाइ छ । बैठकमा पार्टी उपसभापति तथा अर्थमन्त्री डा. स्वर्णिम वाग्लेले आफ्नो भारतको औपचारिक भ्रमणबारे समेत बैठकलाई जानकारी गराएको उहाँले बताउन भयो । उहाँले भन्नुभयो, ‘अब मधेस प्रदेशको अधिवेशन गर्नुपर्नेछ । मधेश प्रदेशमा हाम्रो पार्टीका केही आन्तरिक समस्या पनि भएको कारण पार्टी सहमहामन्त्री हरी ढकालको संयोजकत्वमा छानविन गर्ने टिम गएको थियो । उहाँहरुले आज प्रारम्भिक प्रतिवेदन बुझाएको छ । विस्तृत प्रतिवेदन तयारी अवस्थामा रहेकोले तयार भइसकेपछि बुझाउँछौँ भन्नुभएको छ । त्यसैगरप् पार्टीका केही विभागहरुमा सदस्य मनोनयन गर्ने काम पनि भएको छ । पार्टी उपसभापति समेत रहनुभएका डा. स्वर्णिम वाग्लेले भर्खरै भारतको औपचारिक भ्रमण पूरा गरेर फर्किनुभएको छ । यस विषयमा उहाँले पार्टी सचिवालय बैठकलाई जानकारी समेत गराउनुभएको छ । आजकै पार्टी सचिवालय बैठकमा रोकिएका सबै कार्यक्रमलाई निरन्ता दिने निर्णय पनि भएको छ । त्यसैगरी बैठकमा पार्टी सभापतिज्यूले पार्टी, संसद र सरकारबीच अन्योन्याश्रित सम्बन्ध भएको कारणले सोहीअनुसार गर्न निर्देशन दिनुभएको छ ।’

बैठकमा पार्टी सभापति रवि लामिछानेले पार्टी, संसद र सरकारबीच अन्योन्याश्रित सम्बन्ध रहेकाले सोहीअनुसार काम गर्न सरोकारवालाई निर्देशन दिएको समेत प्रवक्ता खरेलले बताउनु भयो । –न्युज एजेन्सी नेपाल