१२ असोज, काठमाडौं । एसियन गेम्स क्रिकेटमा पहिलोपटक सेमिफाइनल पुग्ने लक्ष्यसहित नेपालले मंगलबार श्रीलंकासँग क्वाटरफाइनल खेल्दैछ ।

१६ वर्षपछि एसियन गेम्सको क्रिकेटमा यी दुई टोली आमनेसामने हुन लागेका हुन् । तर नेपालको ऐतिहासिक यात्रामा फेरि वर्षा बाधक बन्न सक्ने चिन्ता छ । सन् २०१० को ग्वाङ्झाउ एसियन गेम्समा क्वाटरफाइनलमै श्रीलंकासँग पराजित भएको नेपाल यसपटक त्यो हारको इतिहास बदल्ने लक्ष्यमा छ । त्यसबेला नेपाल ७२ रनमा अलआउट भएको थियो भने श्रीलंकाले ८ विकेट गुमाएर लक्ष्य पूरा गरेको थियो । यसपटकको खेल नेपालका लागि अर्को कारणले पनि विशेष छ । नेपाल र श्रीलंकाबीच अहिलेसम्म आधिकारिक टी-२० अन्तर्राष्ट्रिय खेल भएको छैन । सन् २०२४ को टी-२० विश्वकपमा तय भएको पहिलो भेट पनि वर्षाका कारण टस नै नभई रद्द भएको थियो । मंगलबारको खेल सम्पन्न भए दुई टोलीबीच पहिलो टी-२० अन्तर्राष्ट्रिय भिडन्त हुनेछ ।

पहिलोपटक सेमिफाइनल पुग्ने लक्ष्य

एसियन गेम्स क्रिकेटमा नेपालले अहिलेसम्म क्वाटरफाइनल पार गर्न सकेको छैन । सन् २०१० मा श्रीलंका, २०१४ मा अफगानिस्तान र सन् २०२२ (२०२३) मा भारतसँग पराजित हुँदै नेपाल अन्तिम आठबाटै बाहिरिएको थियो । यसपटक भने नेपाल समूह ‘ए’ को विजेता बनेर क्वाटरफाइनल पुगेको हो । समूह चरणमा अफगानिस्तानलाई हराएको नेपालले जापानसँगको खेल वर्षाका कारण नतिजाविहीन भएपछि शीर्ष स्थान सुरक्षित गरेको थियो । कप्तान दीपेन्द्रसिंह ऐरीले पदक जित्ने लक्ष्यसहित सबै खेलाडीले शतप्रतिशत योगदान गरिरहेको बताएका छन् । श्रीलंकालाई हराउन सके नेपाल पहिलोपटक सेमिफाइनलमा पुग्नेछ, जहाँ भारतसँग प्रतिस्पर्धा हुनेछ ।

नेपालको यात्रामा वर्षा बाधक बन्ने जोखिम

नेपालको सेमिफाइनल यात्रामा श्रीलंकासँगै मौसम पनि चुनौती बनेको छ । जापानमा पछिल्ला दिन लगातार वर्षा भइरहेको छ । सोमबार भएका एसियन गेम्सका दुवै क्वाटरफाइनल वर्षाकै कारण रद्द भएका थिए । खेल हुन नसकेपछि वरीयताका आधारमा भारत र पाकिस्तान सेमिफाइनल पुगेका छन् भने अफगानिस्तान र हङकङ प्रतियोगिताबाट बाहिरिएका छन् । नेपाल र श्रीलंकाबीचको खेल पनि वर्षाका कारण हुन नसके उच्च वरीयतामा रहेको श्रीलंका सेमिफाइनल पुग्नेछ । त्यसो भए नेपालले पहिलोपटक अन्तिम चारमा पुग्ने अवसर गुमाउनेछ ।

नेपालले श्रीलंकालाई हराएमा एसियन गेम्समा पहिलोपटक सेमिफाइनल पुग्ने मात्र होइन, यसअघिको क्वाटरफाइनल हारको सिलसिला पनि तोड्नेछ । त्यसैले नेपाली समर्थकको नजर मंगलबारको खेलमा मात्र नभई मौसममा पनि रहनेछ ।