१८ असोज, कामठाडौं ।  भारतीय प्रधानमन्त्री नरेन्द्र मोदीले फ्लाइदुबईका पाइलट क्याप्टेन स्मित मच्छरसँग फोनमा कुराकानी गर्दै उनको शीघ्र स्वास्थ्यलाभको कामना गरेका छन् ।

मोदीले गम्भीर चोट लागे पनि यात्रुको ज्यान बचाउन क्याप्टेन स्मितले देखाएको साहस, धैर्य र सुझबुझप्रति सम्पूर्ण देशलाई गर्व रहेको बताए । उनले भारतभर क्याप्टेन स्मितको स्वास्थ्यलाभका लागि प्रार्थना तथा महामृत्युञ्जय मन्त्रको जप भइरहेको जानकारी दिए ।

प्रधानमन्त्री मोदीले क्याप्टेन स्मित स्वयं गम्भीर घाइते भएर जीवन–मृत्युको संघर्ष गरिरहेका भए पनि आफ्नो ज्यानको परवाह नगरी यात्रुहरूको सुरक्षालाई प्राथमिकता दिएको बताए । क्याप्टेन स्मितले प्रधानमन्त्री मोदीलाई घटनाका क्रममा आफू लडेर घाइते भएको बताए । आफूलाई धेरै चोट लागे पनि विमानभित्रको अवस्था बिग्रिँदै गएको महसुस भइरहेको उनले बताए ।

मोदीसँग कुराकानीका क्रममा क्याप्टेन स्मित भावुक भएका थिए । उनले आफूले पीडाका बेला हनुमान चालिसा पाठ गरिरहे र भगवानले नै आफ्नो ज्यान बचाएको विश्वास रहेको बताए । उनले भने, ‘म धेरै सकारात्मक छु । जब मलाई दुख्छ, मलाई एउटै कुरा आउँछ, म हनुमान चालिसा पढिरहेको हुन्छु। मलाई थाहा छ, भगवानले नै मलाई बचाउनुभएको हो।’

प्रधानमन्त्री मोदीले सावरकुन्डलालगायत भारतका विभिन्न स्थानमा क्याप्टेन स्मितको दीर्घायु र शीघ्र स्वास्थ्यलाभका लागि पूजाअर्चना भइरहेको बताए । पूरा भारत क्याप्टेन स्मित स्वस्थ भएर फर्किएको हेर्न प्रतीक्षारत रहेको उनको भनाइ थियो।

प्रधानमन्त्री मोदीले क्याप्टेन स्मितको उपचार र हेरचाहका लागि साउदी अरब र संयुक्त अरब इमिरेट्सका सरकारलाई पनि धन्यवाद दिए। आवश्यक परेको अवस्थामा आफू केवल एक फोनको दूरीमा रहेको उनले बताए।