२२ असाेज, काठमाडाैं । ललितपुर महानगरपालिकाका प्रमुख चिरीबाबु महर्जनले नेपाली काँग्रेसले अब जनताले प्रत्यक्ष अनुभूति गर्ने गरी सेवा प्रवाह र विकासमा ‘डेलिभरी’ दिनुपर्ने बताएका छन् । 

काँग्रेसले अब विगतका कामको चर्चा गरेर मात्रै नहुने उनले बताए । नेपाली काँग्रेसको १५ औँ महाधिवेशनमा केन्द्रिय कार्यसमितिको खुला सदस्य पदमा उम्मेदवारी दिनुभएका महर्जनले आफू दुई कार्यकाल ललितपुर महानगरपालिकाको प्रमुखका रूपमा काम गरेको अनुभव पार्टीको नीति निर्माण र कार्यसम्पादनमा उपयोग गर्न उम्मेदवारी दिएको बताए । अहिलेका युवा पुस्ता तथा आम नागरिकले भाषण र आश्वासनभन्दा कामको परिणाम खोजिरहेको उल्लेख गर्दै काँग्रेस नेतृत्वले त्यसअनुसार काम गर्नुपर्ने उनले बताए । काँग्रेसले विगतमा आफूले गरेका कामको विवरण प्रश्तुत गरेर मात्र अबको राजनीतिक चुनौती सामना गर्न नसक्ने उनको भनाइ छ । काँग्रेसले आगामी दिनमा देश विकासका लागि स्पष्ट योजना, नीति र दृष्टिकोणसहित अघि बढ्नुपर्ने बताए ।  महाधिवेशनले मुलुकको विकासका लागि प्रभावकारी योजना र नीति निर्माण गर्न सक्ने नेतृत्व चयन गर्नुपर्ने उनको भनाइ छ । उनले काँग्रेसप्रति युवाको काँग्रेसप्रतिको आकर्षण बढ्दै गएको पनि बताए ।काँग्रेस सभापतिमा गगन थापा आउने अपेक्षाले युवामा नयाँ उत्साह देखिएको उनको भनाई छ ।

साथै पार्टीको संशोधित विधानले युवालाई समेट्ने गरी व्यवस्था गरेको पनि उनले बताए । उनले पार्टीलाई एकताबद्ध र संगठित बनाउने विषय पनि आफ्नो प्राथमिकतामा रहेको बताए । पार्टीभित्र दुई खेमाको अवस्था देखिएकोले त्यसलाई एकीकृत गर्दै प्रभावकारी रूपमा अघि बढाउनुपर्ने आवश्यकता रहेको उनको भनाई छ । उनले भने,‘जनतालाई डेलिभरी चाहिएको छ । कुरा होइन, गफ होइन, काम चाहिएको छ । दुई पटक मेयर भएर काम गरेको अनुभवलाई अब काँग्रेसको केन्द्रीय कार्यसमितिमा उपयोग गर्न चाहन्छु । मैले यो गरेँ, त्यो गरेँ भनेर अब काम बन्दैन । अब डेलिभरी दिन सक्ने गरी काम गर्न सक्नुपर्छ । गगन थापाजी सभापतिमा आउँदै हुनुहुन्छ भन्ने कुराले युवाहरू तरङ्गित भएका छन्, पार्टीको संशोधित विधानले पनि युवाहरूलाई प्रचुर मात्रामा सम्बोधन गरेको छ र युवाहरूलाई पार्टीमा ल्याउन क्लस्टरसमेत बनाएको छ ।’

उनले काँग्रेसको महाधिवेशनबाछ चर्चित अनुहारभन्दा काम गरेर देखाएका र सक्षम व्यक्तिलाई नेतृत्वमा ल्याउनुपर्नेमा जोड दिए । चर्चित अनुहारले मात्रै डेलिभरी गर्न नसक्ने उनको भनाई छ । उनले महाधिवेशन प्रतिनिधिहरूलाई ‘टेस्टेड’ र नयाँ सम्भावना बोकेका दुवै खालका सक्षम व्यक्तिलाई मूल्याङ्कन गरेर छनोट गर्न आग्रह गरे । योग्य र काम गर्नसक्ने नेतृत्व चयनबाट काँग्रेसको भविष्य निर्धारण हुने उनको भनाई छ । –न्युज एजेन्सी नेपाल