२६ असोज, काठमाडौं । काठमाडौं उपत्यकामा फरक कम्पनीका खाना पकाउने एलपी ग्यासका सिलिन्डर साटफेर गर्न सकिने केन्द्रको सङ्ख्या ११ पुर्‍याइएको छ ।

यसअघि आइतबारदेखि ६ स्थानमा सुरु गरिएको व्यवस्था सोमबारदेखि थप पाँच स्थानमा विस्तार गरिएको हो ।

दसैंका बेला ग्यास अभाव झेलिरहेका उपभोक्तालाई सहज बनाउन नेपाल आयल निगमको समन्वय र ग्यास बिक्रेता महासंघको सहकार्यमा वितरण केन्द्र थप गरिएको नेपाल एलपी ग्यास उद्योग संघले जनाएको छ ।

संघका अनुसार सोमबारदेखि काठमाडौंको चपली बुढानीलकण्ठ, ललितपुरको हरिसिद्धि, कलंकी, खसीबजारस्थित आरके ट्रेडर्स र सन्तुगलमा थप ग्यास साटफेरको व्यवस्था गरिएको छ ।

यसअघि हरिसिद्धि, कलंकी, सुकेधारा, बालाजु औद्योगिक क्षेत्रको गेटअगाडि, पेप्सीकोला र सिफलचौरमा ग्यास साटफेर गर्ने व्यवस्था मिलाइएको थियो ।

तोकिएका ११ केन्द्रमा उपभोक्ताले आफूसँग भएको जुनसुकै कम्पनीको खाली सिलिन्डर बुझाएर उपलब्ध अर्को कम्पनीको भरिएको सिलिन्डर लिन सक्नेछन् । यसका लागि अतिरिक्त शुल्क तिर्नुपर्ने छैन ।