३ कात्तिक, काठमाडौं । नेपाल प्रिमियर लिग (एनपीएल) को तेस्रो संस्करणमा निर्णय पुनरावलोकन प्रणाली (डीआरएस) प्रयोग गरिने भएको छ।

नेपाल क्रिकेट संघ (क्यान) को आयोजनामा कात्तिक ९ गतेदेखि सुरु हुने प्रतियोगितामा अम्पायरका निर्णयलाई थप विश्वसनीय र पारदर्शी बनाउन यो प्रविधि भित्र्याउन लागिएको हो। एनपीएलका अनुसार डीआरएसले खेलका क्रममा हुन सक्ने अम्पायरिङ त्रुटि कम गर्न र खेलको निष्पक्षता बढाउन सहयोग गर्नेछ। यस प्रणालीमार्फत खेलाडीले अम्पायरको निर्णयमा असहमति जनाउँदै पुनरावलोकनको माग गर्न सक्नेछन्। क्यानका सचिव पारस खड्काका अनुसार डीआरएस जडान तथा सञ्चालनमा लाग्ने खर्च क्यान र प्रतियोगितामा सहभागी आठवटै फ्रेन्चाइजी टोलीले संयुक्त रूपमा व्यहोर्नेछन्। प्रतियोगिताले अन्तर्राष्ट्रिय क्रिकेट परिषद् (आईसीसी) बाट टी–२० लिगको औपचारिक मान्यता तथा स्वीकृतिसमेत पाएको छ।

मंसिर ५ गतेसम्म काठमाडौंको कीर्तिपुरस्थित त्रिवि अन्तर्राष्ट्रिय क्रिकेट मैदानमा सञ्चालन हुने प्रतियोगिताको उद्घाटन खेलमा लुम्बिनी लायन्स र सुदूरपश्चिम रोयल्स भिड्नेछन्। विदेशी खेलाडीको सहभागिता र आधुनिक खेल प्रविधिको प्रयोगले यस संस्करणको आकर्षण बढ्ने आयोजकको अपेक्षा छ। डीआरएसको समावेशलाई नेपाली क्रिकेटको प्राविधिक स्तर सुधार गर्ने महत्त्वपूर्ण कदमका रूपमा हेरिएको छ।