०४ कात्तिक, काठमाडौं । चितवनको सौराहा घुम्न आएका ३५ जनाभन्दा बढी विदेशी पर्यटकले नेपालीसँगै बडादसैँ मनाएका छन्। विभिन्न होटलमा उनीहरूले टीका र जमरा लगाउँदै नेपाली संस्कृति तथा परम्पराको अनुभव गरेका हुन्।

सौराहाका होटलहरूले पर्यटकलाई टीका र जमरा लगाइदिएर दसैँको खुसी साटासाट गरेका थिए। अमेरिका, फ्रान्स, जर्मनी, स्विट्जरल्यान्ड, नेदरल्यान्ड्स, आयरल्यान्ड र अस्ट्रेलियालगायत देशका पर्यटक यसमा सहभागी भएका थिए। अमेरिकाबाट आएका डविट, आयरल्यान्डका सेरिजेन्ट र फोरिभ तथा अस्ट्रेलियाकी जयाले नेपाली परम्पराअनुसार दसैँ मनाउन पाउँदा खुसी लागेको बताएका छन्। होटल व्यवसायीका अनुसार विदेशी पर्यटकसँग चाडपर्व मनाउँदा नेपाली संस्कृति र परम्पराको प्रचार हुनुका साथै पर्यटन प्रवर्द्धनमा सहयोग पुग्छ।

चितवन राष्ट्रिय निकुञ्जको तथ्यांकअनुसार सौराहा आउने पर्यटकमध्ये तेस्रो मुलुकका पर्यटकको हिस्सा करिब २५ प्रतिशत छ। वन्यजन्तु र प्राकृतिक सुन्दरतासँगै नेपाली संस्कृति तथा चाडपर्वले पनि विदेशी पर्यटकलाई आकर्षित गर्ने गरेको छ।