०५ कात्तिक, तनहुँ। १४० मेगावाट क्षमताको निर्माणाधीन तनहुँ जलविद्युत् आयोजनाको जलाशयबाट प्रभावित हुने चारवटा झोलुङ्गे पुल पुनर्निर्माण गरिने भएको छ।

स्थानीय बासिन्दाको आवागमन सहज बनाउने उद्देश्यले पुल निर्माणको ठेक्का सम्झौता गरिएको हो। तनहुँ हाइड्रोपावर लिमिटेड र थानी काली जोशी संयुक्त उपक्रम (जेभी), काठमाडौंबीच पुल पुनर्निर्माणका लागि सम्झौता भइसकेको आयोजना प्रमुख श्यामजी भण्डारीले जानकारी दिए। सम्झौताअनुसार चारवटै पुलको निर्माण २०८५ साल वैशाखभित्र सम्पन्न गर्ने लक्ष्य राखिएको छ। पुल पुनर्निर्माणका लागि करबाहेक १६ करोड ९७ हजार ३८ रुपैयाँमा ठेक्का सम्झौता भएको भण्डारीले बताए। उनका अनुसार निर्माणका लागि आवश्यक उपकरण तथा सामग्रीसमेत आपूर्ति भइसकेका छन्।

आयोजनाको जलाशय निर्माणका कारण पुराना पुल प्रभावित हुने भएपछि चुलेसी, टुनिबोटे, डब्ल्याङ र टुटुवामा नयाँ झोलुङ्गे पुल निर्माण गर्न लागिएको हो। जलाशयबाट प्रभावित हुने पुलको पुनःस्थापना तथा पुनर्निर्माणका लागि स्थानीय बासिन्दासँग परामर्श गरी उपयुक्त स्थान छनोट गरिएको भण्डारीले बताए। उनका अनुसार स्थानीयको आवश्यकतालाई ध्यानमा राखेर पुल निर्माणको स्थान तय गरिएको हो। जलाशय निर्माणका कारण पुराना पुल प्रभावित हुँदा स्थानीय बासिन्दाको दैनिक आवागमनमा समस्या हुन सक्ने भएकाले पुनर्निर्माणलाई प्राथमिकता दिइएको आयोजनाले जनाएको छ।

नयाँ पुल निर्माण भएपछि स्थानीयलाई दैनिक आवतजावत गर्न तथा विभिन्न सेवा र सुविधामा पहुँच स्थापित गर्न सहज हुने अपेक्षा गरिएको छ। १४० मेगावाट क्षमताको तनहुँ जलविद्युत् आयोजना निर्माणका क्रममा जलाशयबाट प्रभावित हुने पूर्वाधारको पुनःस्थापना पनि आयोजनाको महत्त्वपूर्ण पक्ष बनेको छ। निर्धारित समयभित्र चारवटै पुल निर्माण सम्पन्न भएमा प्रभावित क्षेत्रका बासिन्दाको आवागमनलाई सहज र व्यवस्थित बनाउन सहयोग पुग्नेछ।