०९ कात्तिक, काठमाडौं । नेपाल प्रहरीको स्टाफ कलेजलाई प्रभावकारी बनाउन गठित अध्ययन समितिले प्रहरी महानिरीक्षक दानबहादुर कार्कीलाई सुझावसहितको प्रतिवेदन बुझाएको छ।

डीआईजी विश्व अधिकारीको नेतृत्वमा भदौ १७ गते गठित समितिले पाठ्यक्रम, प्रवेश परीक्षा र कलेज सञ्चालनसम्बन्धी व्यवस्थामा परिमार्जन गर्न सुझाव दिएको हो। प्रहरी प्रवक्ता डीआईजी अबिनारायण काफ्लेका अनुसार यस वर्ष २०७० सालमा प्रहरी निरीक्षकमा भर्ना भएका अधिकृतहरूले मात्र स्टाफ कलेजको प्रवेश परीक्षा दिन पाउनेछन्। पुसको पहिलो सातादेखि परीक्षा सञ्चालन गर्ने तयारी छ। त्यसका लागि ६५ जना डीएसपीको सूचीसमेत सार्वजनिक गरिएको छ।

समितिले प्रवेश परीक्षाको उत्तीर्णाङ्कमा परिमार्जन तथा वार्षिक ३५ जना अधिकृतलाई स्टाफ कलेजमा सहभागी गराउने व्यवस्था प्रभावकारी बनाउन सुझाव दिएको छ। यसअघि पहिलो ब्याचमा १७ र दोस्रो ब्याचमा १५ जना मात्रै उत्तीर्ण भएपछि पाठ्यक्रम र परीक्षाबारे प्रहरीभित्र असन्तुष्टि बढेको थियो। महाराजगञ्जस्थित राष्ट्रिय प्रहरी प्रशिक्षण प्रतिष्ठानमा सञ्चालन हुने स्टाफ कलेजको कोर्स १६ महिनाको हुन्छ। स्टाफ कलेज उत्तीर्ण नगरेका अधिकृतलाई डीआईजीमा बढुवा हुन नसक्ने व्यवस्था रहेकाले यसको प्रभावकारिता र प्रवेश प्रक्रिया सुधार गर्नुपर्ने आवश्यकता देखिएको हो।