१९ कात्तिक, काठमाडौं । प्रदर्शनको तयारीमा रहेको नेपाली फिल्म ‘पाँच पाण्डव’ अन्तिम समयमा सरकारी हस्तक्षेपको आशंकाले अन्योलमा परे पनि शुक्रबारदेखि प्रदर्शनमा आउने भएको छ ।

बुधबार सञ्चार मन्त्रालयबाट तत्काल अग्रिम बुकिङ रोक्न भनिएपछि फिल्मको प्रदर्शनबारे अन्योल सिर्जना भएको थियो । तर बिहीबार फिल्म निर्माण टोली र चलचित्र जाँच समितिका अधिकारीबीच भएको छलफलपछि प्रदर्शनमा कुनै अवरोध नरहने स्पष्ट पारिएको हो । केन्द्रीय चलचित्र जाँच समितिका विज्ञ सदस्य मनोज पण्डितले फिल्म प्रदर्शनको अन्तिम निर्णय गर्ने अधिकार समितिकै हुने र सरकारले फिल्म प्रदर्शनमा बाधा नभई सहयोगी भूमिका खेल्नुपर्ने बताए । फिल्मका लेखक सुशील पौडेलले भने महाभारतका पात्रलाई विम्बका रूपमा प्रयोग गरिएको भन्दै फिल्म नहेरी विरोध नगर्न आग्रह गरेका छन् ।