|  

विदेश मात्रै होइन, नेपालभित्रै पनि मानव बेचबिखन : सांसद विक

०१ मंसिर, काठमाडौं । नेपाली कम्युनिस्ट पार्टीकी सांसद पार्वती विकले मानव बेचबिखनको समस्या विदेशमा मात्रै सीमित नरहेको भन्दै नेपालभित्रै भइरहेको बालश्रम, श्रम शोषण र ओसारपसार नियन्त्रण गर्नुपर्नेमा जोड दिएकी छन् ।

उनले गरिब परिवारका बालबालिकालाई पढाइदिने र राम्रो भविष्य बनाइदिने प्रलोभनमा गाउँबाट सहर ल्याएर होटल, रेस्टुरेन्ट, घर तथा इँटा भट्टामा काम लगाउने गरिएको बताइन् । वैदेशिक रोजगारीको आवरणमा संगठित रूपमा हुने मानव बेचबिखनदेखि देशभित्रकै शोषणसम्म समेट्ने गरी समयानुकूल कानुन बनाउनुपर्ने उनको माग छ । प्रस्तावित मानव बेचबिखन तथा ओसारपसार (नियन्त्रण) विधेयकमाथि मंगलबार प्रतिनिधिसभाको महिला तथा सामाजिक मामिला समितिमा भएको छलफलमा उनले यस्तो धारणा राखेकी हुन् । उनले एक वर्षअघि ललितपुरको इँटा भट्टाबाट सल्यानका पाँच बालबालिकाको उद्धार गरेको प्रसंग उल्लेख गर्दै बालश्रमको समस्या अझै नियन्त्रणमा आउन नसकेको बताइन् । वैदेशिक रोजगारीमा पठाउने नाममा दलालले घरमै पुगेर अभिभावकलाई विश्वासमा लिने, राहदानीदेखि हवाई यात्रासम्मको व्यवस्था मिलाउने र विदेश पुगेपछि मात्रै श्रमिकले आफू बेचिएको थाहा पाउने अवस्था रहेको उनको भनाइ थियो ।