|  

मोबाइल र इन्टरनेट सेवाको गुणस्तर मापन गर्ने सरकारको तयारी

५ असार, काठमाडौं । नियामक नेपाल दूरसञ्चार प्राधिकरणले देशभर मोबाइल तथा इन्टरनेटको गुणस्तर मापन गर्ने भएको छ ।

पछिल्लो समय मोबाइल सेवाको गुणस्तर मापदण्ड पूरा गर्न सबै टेलिकम कम्पनी असफल हुँदै आएका छन । साथै मोबाइल तथा डेटाको गुणस्तरका विषयलाई लिएर गुनासो समेत बढ्दै आएको छ । यही सन्दर्भलाई लिएर प्राधिकरणले गत पुसको अन्त्यमा परामर्शका लागि आशयपत्र माग गरेको थियो ।

प्राधिकरणले कूल १८ हजार किलोमिटर समेट्ने गरी तीन प्याकेजमा यो परियोजना अघि बढाएको थियो, जसमा पहिलो प्याकेज अन्तर्गत प्रदेश १ र मधेस प्रदेश, प्याकेज २ मा बागमती र गण्डकी प्रदेश तथा प्याकेज ३ मा लुम्बिनी, सुदूरपश्चिम र कर्णाली प्रदेश समेटिनेछन ।

प्राधिकरणले परियोजना तीन ओटा प्याकेज छुट्याए पनि पहिलो चरणमा छनोट हुने कम्पनी भने सबैमा एउटै छन । छनोट हुनेमा महाकाली मेची टक्नोलोजी, इन्क्लुसिभ-एभरेष्टको जेमी, टीसीएन-माइलस्टोनको जेभी र महारुद्र-सिनर्जीको जेभी रहेका छन ।

प्राधिकरणका अनुसार मोबाइल सेवा अन्तर्गत सबै सेवाप्रदायकको भ्वाइस, एसएमएस तथा डेटाको गुणस्तर ड्राइभ टेस्टका आधारमा मापन गरिने छ, जसमा परामर्शदाताले ग्रामीण तथा सहरी भेगका साथै राजमार्ग तथा सहायक राजमार्गमा समेत परीक्षण गर्नुपर्ने छ ।

त्यसका लागि कम्पनी आफैंले सिस्टम ल्याएर मोबाइल सेवाको गुणस्तर मापन गरी दूरसञ्चार प्राधिकरणलाई प्रतिवेदन बुझाउनुपर्ने जनाइएको छ ।