|  

जिल्ला प्रहरी कार्यालय सल्यान हिरासतभित्र एक ब्यक्ति गरे आत्महत्याको प्रयास 

२८ फागुन,काठमाडौं । जिल्ला प्रहरी कार्यालय सल्यान हिरासतभित्र एक जनाले आत्महत्याको प्रयास गरेका छन् ।

जबरजस्ती हाडनाता करणीमा पक्राउ परेका वनगाड कुपिण्डे नगरपालिका १२ का एक ३४ वर्षीय एक पुरुषले हिरासतभित्रै बिलेटले घाँटी रेटेर आत्महत्याको प्रयास गरेको जिल्ला प्रहरी कार्यालय सल्यानले जनाएको छ । आज बिहान ८ः३० बजे डिउटीमा खटिएका प्रहरीलाई आँखा छलेर बल्याङकेट ओढेर ओछ्यानभित्र बिलेटले घाटी रेटेर आत्महत्याको प्रयास गरेको प्रहरी निरीक्षक सन्तोष खनालले जानकारी दिए । 

उनका अनुसार उक्त व्यक्ति बिहान अवेरसम्म सुतेको र ओछ्यानबाट रगत बगिरहेको देखेपछि तुरुन्तै उपचारका लागि जिल्ला अस्पताल सल्यानमा लगिएको हो । घाँटीमा बिलेटले धेरै रेटिएकोले जिल्ला अस्पताल सल्यानमा उपचार सम्भव नभएपछि थप उपचारका लागि जिल्ला बाहिर रिफर गर्न लागिएको प्रहरी निरीक्षक खनालले बताए । उनी गत २५ गते जवरजस्ती हाडनाता करणीमा पक्राउ परेका थिए ।

उनले बिलेट कसरी र कहाँबाट ल्याएका हुन भन्नेबारे अनुसन्धान भईरहेको जिल्ला प्रहरी कार्यालय सल्यानले जनाएको छ ।