२२ बैशाख, काठमाडौं । प्रधानमन्त्री पुष्पकमल दाहाल प्रचण्डले शनिबार पार्टी संसदीय दलको बैठकमा समसामयिक राजनीतिबारे चर्चा गर्दै तत्काल सत्ता गठबन्धन नभत्कने दाबी गरेका छन्। 

पछिल्ला केही दिनयता गठबन्धन भत्काउनेगरी प्रयास भएको भए पनि अहिले तत्काल कुनै समस्या नआउने उनले बैठकमा भनेका थिए। 

‘गठबन्धन भत्काउन सकिन्छ कि भनेर केही व्यक्तिहरू लागेका छन्,’ प्रचण्डको भनाइ उदृत गर्दै एक सांसदले भने, ‘तर, अहिले कुनै समस्या आउँदैन।’

साथै, उनले बैठकमा आगामी बजेट, नेपाली कांग्रेसले सदनमा गरिरहेको अवरोध लगायतका विषयमा छलफल गरेका छन्। 

राष्ट्रिय राजनीति, सहकारी, नीति कार्यक्रम र बजेटमा केन्द्रीत रहेर शनिबार दिउँसो ५ घन्टा लामो बैठक बसेको थियो।