०५ असोज, काठमाडौं । अमेरिकी राष्ट्रपति जो बाइडेन र अष्ट्रेलियाका प्रधानमन्त्री एन्थोनी अल्बेनिजबीच भेटवार्ता भएको छ ।

सेप्टेम्बर २० मा डेलावेयरको विल्मिङ्टनमा भएको भेटवार्ताका क्रममा दुबै पक्षले साझेदारीका लागि एकअर्कालाई धन्यवाद दिँदै द्विपक्षीय सम्बन्धबारे समीक्षा गरेका छन् । उनीहरुले अमेरिका-अष्ट्रेलिया गठबन्धन द्विपक्षीय सम्बन्धको मूल रहेको कुरामा जोड दिँदै यसका तीन स्तम्भहरूः रक्षा र सुरक्षा, आर्थिक र जलवायु र स्वच्छ ऊर्जा क्षेत्रमा भएको प्रगतिबारे छलफल गरेका छन् ।

दुबै नेताले दुई देशबीचको बलियो आर्थिक सम्बन्धलाई प्रतिबिम्बित गरे र जलवायु परिवर्तन र स्वच्छ ऊर्जा संक्रमणलगायत नयाँ चुनौतीको सामना गर्न गठबन्धनलाई आधुनिकीकरण गर्न विगत दुई बर्षमा भएको प्रगतिबारे छलफल गरे । उनीहरूले महत्वपूर्ण खनिज आपूर्ति शृङ्खला निर्माणका लागि सहयोग विस्तार गर्ने र जापानको हिरोसिमामा मे २०२३ मा हस्ताक्षर गरिएको कम्प्याक्ट अनुसार स्वच्छ ऊर्जामा सङ्क्रमणलाई गति दिने प्रतिबद्धता पनि दोर्होयाए । दुई नेताहरूले ताइवान स्ट्रेटमा शान्ति र स्थिरता कायम गर्न आफ्नो समर्थन, रुसको क्रूर आक्रमण विरुद्ध युक्रेनको रक्षा गर्न निरन्तर सहयोग र गाजाका जनतालाई दिगो युद्धविराम र मानवीय सहायता बढाउनका लागि आफ्नो समर्थनबारे पनि छलफल गरेका छन ।

साथै दुई देशका वरिष्ठ नेताहरूले स्वतन्त्र र खुला इन्डो-प्यासिफिकका लागि आफ्नो साझा दृष्टिकोणलाई अगाडि बढाउन द्विपक्षीय साझेदारीलाई गहिरो बनाउने प्रतिबद्धता व्यक्त गरे ।