१० असोज, काठमाडौं । मदनकृष्ण श्रेष्ठ र हरिवंश आचार्यको मह सञ्चारले कार्तिक २९ गतेदेखि महजात्रा आयोजना गर्ने भएको छ । 

आज काठमाडौंमा पत्रकार सम्मेलन गर्दै मह सञ्चारले दर्शकलाई हसाउदै समाज प्रति सोच्न बाध्य पार्ने उदेश्यका साथ महजात्रा आयोजना गर्न लागेको जानकारी दिएको हो । मह जोडीले नेपालमा १० बर्षपछि मिरा फाउण्डेशन र मानव सेवा आश्रमको सहयोगार्थ पुनः एकपटक महजात्रा नामक प्रहसनमार्फत आफ्नो प्रत्यक्ष प्रस्तुति दिने जनाएका छन् । महजात्रा मह सञ्चार सुश्री मिडिया प्रालिको सहकार्यमा कार्तिक २९ गतेदेखि प्रज्ञा प्रतिष्ठानमा हुने र त्यसपछि देशव्यापीरुपमा मह जात्रा आयोजना हुने बताइएको छ।

हास्य व्यङग्यको माध्यमबाट समाजमा रहेका समसामयिक समस्याहरू र विविध पक्षहरूलाई उजागर गर्ने उदेश्यका साथ मह जात्रा आयोजना गरिएको वरिष्ठ हास्य कलाकार हरिवंश आचार्यले बताए । त्यस्तै वरिष्ठ हास्य कलाकार मदनकृष्ण श्रेष्ठले निष्पक्षमा रुपमा समाजमा देखिएका विषयहरूलाई हास्य व्यङ्ग्यमार्फत उजागर गर्ने बताए । महजात्रा प्रहसनमा ख्यातीप्राप्त हास्य कलाकारहरू किरण केसी, राजाराम पौडेल, शिवहरी पौडेल लगाएतको समेत प्रस्तुती रहने महसञ्चारले जनाएको छ ।