२४ कात्तिक, काठमाडौं । उत्तर कोरियाले हिजो र आज जीपीएस जाम गर्ने आक्रमण गरेको दक्षिण कोरियाले आरोप लगाएको छ ।

उत्तर कोरियाको जीपीएस जाम गर्ने आक्रमणका कारण धेरै पानी जहाज र दर्जनौं विमानलाई असर पुगेको दक्षिण कोरियाले जनाएको छ । उत्तरले आफ्नो सबैभन्दा उन्नत र शक्तिशाली अन्तरमहादेशीय ब्यालेस्टिक मिसाइल (आईसीबीएम) परीक्षण गरेको एक हप्तापछि दक्षिण कोरियाको जीपीएसमाथि आक्रमण भएको खबर आएको हो । हिजो दक्षिण कोरियाले पनि समुद्रमा आफ्नो ब्यालेस्टिक मिसाइल प्रहार गरेको थियो । लगत्तै उत्तर कोरियाले हिजो र आज हेइजु र केसोङमा जीपीएस जाम गर्ने उक्साहटहरू गरेको दक्षिण कोरियाली सेना प्रमुखले बताएका छन् ।

सेनाले पहेँलो सागरमा सञ्चालित जहाज र विमानलाई यस्ता आक्रमणबाट सावधान रहन सुझाव दिएको छ । दक्षिण कोरियाले उत्तर कोरियालाई जीपीएस जाम गर्ने आक्रमण गरेर नउस्काउन चेतावनी दिँदै यसबाट उत्पन्न हुने जुनसुकै घटनाको लागि जिम्मेवार हुनुपर्ने चेतावनी दिएको छ । २ कोरियाबीचको सम्बन्ध वर्षौंदेखि नाजुक अवस्थामा छ । जीपीएस जाम गर्ने आक्रमणले गम्भीर घटनाहरूको जोखिम निम्त्याउँछ, सबैभन्दा खराब अवस्थामा विमान दुर्घटनाहरू पनि हुन सक्ने दक्षिण कोरियाले जनाएको छ ।