२५ कात्तिक, काठमाडौं । नेपाली कांग्रेसका सभापति शेरबहादुर देउवाले रवि लामिछाने पक्राउ पर्दा रास्वपाका नेता तथा कार्यकर्ताहरुले अनावश्यक हो हल्ला गरेको टिप्पणी गरेका छन् ।

गृहजिल्ला जाने क्रममा धनगढी विमानस्थलमा पत्रकाहरुसँगको कुराकानीमा देउवाले यस्तो बताएका हुन । उनले कांग्रेसका नेताहरूलाई मुद्दा लाग्दा आफूहरुले कहिल्यै हल्ला नगरेको भन्दै रास्वपालाई पनि हल्ला नगर्न सुझाव दिएका छन् । उनले लामिछानेले अदालती प्रक्रियालाई सघाउनुपर्ने टिप्पणी गरे । उनले प्रधानमन्त्री केपी शर्मा ओली नेतृत्वको वर्तमान सरकार निर्वाध रुपमा अघि बढ्ने र कांग्रेस–एमालेबीच भएको ७ बुँदे सहमति पूर्ण रुपमा कार्यान्वयन हुने पनि स्पष्ट पारे ।