२९ कात्तिक, काठमाडौं । इजरायलले लेबनानको राजधानी बेरूतको दक्षिणी उपनगर क्षेत्रमा हवाई आक्रमण गरेको छ ।

आक्रमण हुनुभन्दा केही समय अघि इजरायलले त्यस क्षेत्रमा रहेका हिजबुल्लाहको गढका रूपमा मानिएका केही भाग खाली गर्न निर्देशन दिएको थियो । सेप्टेम्बरमा इजरायलले इरान समर्थित जिहादी समूह हिजबुल्लाहविरुद्ध आफ्नो अभियान तीव्र बनाएसँगै पछिल्लो आक्रमणपछि यस क्षेत्रमा धेरै क्षति पुगेको छ । 

सेनाका प्रवक्ता अविचाय अद्राईले सामाजिक सञ्जाल एक्समार्फत जारी विज्ञप्तिमा भनिएको छ, ‘तपाईँहरू हिजबुल्लाहको प्रभाव क्षेत्रनजिकै अवस्थित हुनुहुन्छ भने सावधानी अपनाउनु होला । इजरायली सेनाले निकट भविष्यमा उक्त क्षेत्रमा आक्रमण गर्दैछ ।’ विज्ञप्तिमा शौइफत अल–ओमरोसिया र घोबीरी क्षेत्रका भवनहरू पहिचान गर्ने नक्सा समेत समावेश गरिएको थियो ।