०१ मंसिर, काठमाडौं । नेपाल कम्युनिष्ट पार्टी एमाले इलामको अध्यक्षमा गणेशप्रसाद बराल निर्वाचित भएका छन ।

आज बिहान सम्पन्न पार्टीको ११ औँ अधिवेशनबाट प्रतिस्पर्धी नरेन्द्रनाथ भट्टराईलाई १ सय ८६ मतान्तरले हराउँदै बराल अध्यक्षमा निर्वाचित भएका हुन् । बरालले ३ सय ८१ मत प्राप्त गर्दा भट्टराईले १ सय ९५ मत मात्र प्राप्त गरे । उपाध्यक्षमा २ सय ५० मतका साथ उदयबहादुर राई निर्वाचित भएका छन् । उनका प्रतिस्पर्धी उमेश गुरुङले १ सय ८४ र बुद्धिप्रसाद खनालले एक सय ३७ मत मात्र प्राप्त गरे । सचिवमा रामप्रसाद सुवेदी (रविन्द्र) निर्वाचित भएका छन् भने उपसचिव (खुला) मा रमेश राई, उपसचिव (महिला) मा दिलकुमारी लिम्बू निर्वाचित भएकी छन् ।

बिहीबारदेखि सुरु भएको अधिवेशनमा जिल्लाका ८१ वटा, २१ जनसङ्गठन र पेसागत सङ्गठन, तीन इलाका शाखा एउटा विशेष वडा कमिटीबाट चयन भएका पाँच सय ८७ प्रतिनिधि सहभागी थिए । मत भने ५ सय ८१ मात्र खसेको थियो । सहमतिमा नेतृत्व चयन गर्ने प्रयास असफल भएपछि निर्वाचनबाट नेतृत्व चयन भएको हो ।