७ मंसिर, काठमाडौं । मोरङमा दुईवटा मोटरसाइकल आसपमा ठोकिँदा तीन जना युवकको मृत्यु भएको छ ।

मृत्यु हुनेमा मोरङको पथरीशनिश्चरे नगरपालिका -५ का ३३ वर्षीय दीपक धिमाल, मोरङकै कानेपोखरी गाउँपालिका -४ धम्कुवाका २८ वर्षीय किशोर गुरुङ र बेलबारी नगरपालिका-८ का २६ वर्षीय अमित लिम्बू रहेका छन् ।

उनीहरुको बिहीबार साँझ पूर्व-पश्चिम राजमार्गमा पर्ने मोरङको उर्लाबारी-३ मंगलबारे भन्ने ठाउँमा दुईवटा मोटरसाइकल आपसमा ठोकिँदा तीन जनाको मृत्यु भएको प्रहरीले जनाएको छ ।

दुर्घटनामा अर्का एक युवा पथरीशनिश्चरे -५ का ३८ वर्षीय विष्णु धिमाल गम्भीर घाइते भएको प्रहरीले जनाएको छ । उनको अवस्था चिन्ताजनक छ। धिमालको अहिले झापाको बीएण्डसी अस्पतालमा उपचार भइरहेको छ ।