०९ मंसिर, काठमाडौं । जिल्ला प्रहरी कार्यालय कास्कीको हिरासतमा रहेका राष्ट्रिय स्वतन्त्र पार्टीका सभापति रवि लामिछानेलाई कास्कीमा मुद्दा दर्ता हुनुअघि नै चितवन प्रहरीले बयानका लागि लैजाने तयारी गरेको छ ।

संगठित अपराध र सम्पत्ति शुद्धीकरणको मुद्दामा पुरक जाहेरी लिएर अनुसन्धान गरिरहेको चितवन प्रहरीले चितवनको पनि बयान सकियो भने एकैपटक मुद्दा दर्ता गर्न सहज हुनेगरी गृहकार्य थालेको हो । प्रहरीले जिल्ला अदालत चितवनबाट शुक्रबार लामिछाने लगायत पुरक जाहेरी दर्ता भएका सबैलाई हिरासतमा लिनको लागि नै पक्राउ पुर्जी लिइसकेको छ । साहारा सहकारीबाट रकम गएका पाँच वटा संस्थाका १० जनाविरुद्ध किटानी जाहेरी परेको थियो ।

चितवनका प्रहरी प्रमुख एसपी गौतम मिश्रले सकेसम्म कास्की अदालतमा मुद्दा दर्ता हुनुअगावै अनुसन्धानको लागि चितवन ल्याउने तयारी गरेपनि कहिले ल्याउने भन्ने टुंगो नलागेको जानकारी दिए । सम्पत्ति शुद्धीकरण र संगठित अपराध दुवै जाहेरी लामिछानेमाथि भएकोले प्रहरीले ९० दिनसम्म हिरासतमा राखेर अनुसन्धान गर्न पाउने कानूनी व्यवस्था छ ।