१० मंसिर, काठमाडौं । नेपाल प्रिमियर लिगको फ्रेन्चाइज टिम सुदूरपश्चिम रोयल्सका मेन्टर ब्राड हज नेपाल आइपुगेका छन् ।

अस्ट्रेलियाका पूर्वक्रिकेटर हज आज अपराह्न काठमाडौं आइपुगेका हुन । त्रिभुवन अन्तर्राष्ट्रिय विमानस्थलमा हजलाई सुदूरपश्चिम रोयल्सका मालिक स्वतन्त्र प्रताप शाहले स्वागत गरेका थिए । खेलाडीको भूमिकामा विश्व च्याम्पियन अष्ट्रेलियाबाट खेलेका हजसँग विश्वभरका फ्रेन्चाइज लिग खेलेको अनुभव छ ।

रोयल्सले आफ्नो कोटाका चार विदेशी खेलाडीलाई पनि अनुबन्ध गरिसकेको छ । रोयल्सले एनपीएलका लागि ब्रान्डन मक्मलेन (स्कटल्यान्ड), सेफ अलि जेब (इंग्ल्यान्ड), स्कट कुगेलेइन (न्युजिल्याण्ड) र रोहन मुस्तफा (यूएई) लाई अनुबन्ध गरेको छ । नेपाल क्रिकेट संघ (क्यान) को आयोजनामा हुन लागेको पहिलो संस्करणको नेपाल प्रिमियर लिग (एनपीएल) १५ मंसिरदेखि ६ पुससम्म कीर्तिपुरस्थित त्रिवि अन्तर्राष्ट्रिय क्रिकेट मैदानमा हुनेछ ।