१० पुस, काठमाडौं । भारतीय चर्चित गायक सोनु निगम काठमाडौं पुगेका छन् । बुधबार साँझ हायात रिजेन्सी होटलमा हुन लागेको ‘सोनु निगम लाइभ इन नेपाल’ कन्सर्टका लागि काठमाडौं पुगेका हुन् । उनी त्रिभुवन अन्तर्राष्ट्रिय विमानस्थलमा अवतरण भइसकेका छन् । आयोजकले विमानस्थलमा सोनुलाई ढाका टोपी लगाएर स्वागत गरेका छन् ।

उनलाई विमानस्थलमा खादामालासहित नेपाली टोपी लगाएर स्वागत गरिएको छ । क्रिसमस डेको अवसरमा हायात रिजेन्सी होटल ग्राउन्डमा साँझ हुने ‘सोनु निगम लाइभ इन नेपाल’ मा सोनु गुञ्जिने छन् । निगमले आफू कन्सर्ट गर्न निकै उत्साहित रहेको बताए ।

बेलुका ६ बजेदेखि हुने कन्सर्टमा १० हजारभन्दा बढी दर्शकको उपस्थित हुने आयोजकको अपेक्षा छ । नेपाल टचको आयोजनामा हुन लागेको कन्सर्टमा निगमसहितको २५ सदस्यीय ब्यान्डले ३ घण्टा प्रस्तुति दिनेछ । साथै कमेडियन सन्दिप क्षेत्री पनि स्वागतको लागि विमानस्थल पुगेका थिए ।