२० पुस, काठमाडौं ।  पृथ्वी राजमार्ग अन्तर्गत धादिङको बेनीघाट रोराङ गाउँपालिका–३ सलाङघाटमा दुई वटा कार आपसमा ठोक्किएर दुर्घटना हुँदा चार जना घाइते भएका छन् ।

शनिबार बिहान १० बजे काठमाडौंबाट पोखरा जाँदै गरेको बागमती प्रदेश ०१–०२९ च १३६९ नम्बरको कार र काठमाडौं आउँदै गरेको बागमती प्रदेश ०१–०३० च ४५०९ नम्बरको कार आपसमा ठोक्किँदा दुवै कारमा सवार २–२ जना घाइते भएका हुन् ।

घाइतेहरूमा पोखरा जाँदै गरेको कारमा सवार काठमाडौंको कागेश्वरी मनोहरा नगरपालिका–२ का २६ वर्षीय प्रज्ञान खड्का र २८ वर्षीय प्रमोद खड्का छन् ।

त्यस्तै काठमाडौं आउँदै गरेको कारमा सवार रामेछापको खाडादेवी गाउँपालिका–८ की २१ वर्षीया सुनिता बरैली र मकवानपुरको हेटौडा उपमहानगरपालिका–८ की २४ वर्षीया बबिता खनाल रहेकी छन् । घाइते चारै जनालाई उपचारका लागि मलेखुस्थित टिचिङ हस्पिटल पठाइएको छ।